Sialsir sava te Mizoram-a humhalh turin ngenna siam

Centre for Environment & Social Justice (CESJ) chuan lam hla taka rawn kal thin Sava chi khat ‘Sialsir’ chu Mizoram-a an chawlh chhunga humhalh a nih theih nan District Bawrhsap, VC leh Central YMA te thawhpui-ah an sawm.

CEJS chuan District zawng zawnga Bawrhsap te hnenah an District huamchhunga Sialsir leh nungcha dangte thahna Silai, Sarawkherh, Air Gun leh Thang te khap turin an ngen a. Mizoram-a Sialsir sava te an cham chhunga hlau lo leh thlabar lo a hahdam taka an chawlh theih nan lo humhim a, chawlhna tlaka lo enkawl turin Mizoram Village Council President hnenah Mizoram puma VC zawng zawngte hnena hrilh turin an ngen bawk a. Central YMA hruaitute pawh Mizoram puma an Branch-te hrilh turin an ngen bawk a, Mizoram mipui zawng zawng hnenah pawh heng mikhual, thla hnih emaw chauh cham turte hi dimdawi vek turin an ngen bawk a ni.

Mizoram hi a hausa in Sava chi hrang 670 vel awm anga ngaih a ni a, chung zingah chuan Thlasik laia lo pem thinte, Nipui laia lo cheng thinte bakah an pemna kalkawnga Mizoram rawn paltlang thin engemaw zat awmin, a tam zawkte hi cheng nghet an nih thu CEJS thuchhuah chuan a tarlang a, Sialsir (Amur Falcon-Falco amurensis) te hi sahel ei chi sava zingah chuan hriat theih china pem thui ber an ni a. Mongolia, China leh Russia ram atangin Thlasik khawvawt tlansanin Africa khawmualpui chhim lamah daih an pem thin a. Mongolia, China leh Russia ramah te hian no neiin an awm a, Thlasik a lo thlen dawnah Africa chhimlam panin an zin kawng an zawh tan thin a. An zinna kawngah hian hmarchhak State thenkhatah chawl khawmuangin Khuangchawi thla laihawlah hi chuan Mizoram pawh an lo thleng tawh thin a. Pawltlak thla ah Mizoram an chhuahsan fel thawkhat tawh thin nia hriat a ni.