Furpui laiin buhfai harsatna a awm lo; Ration Card-a hming chuang zat 11,69,048

Food Civil Supply & Consumer Affairs (FCS&CA) Director Saizikpuii chuan Fur ruahtui tlak chhungin khaw hmunah mah buhfai harsatna a thleng lo tih ZALEN a hrilh a. Hetihlai hian Mizorama ration Card nuai hnih chuang awm a hming chuang zat chu 11,69,048 a tling.

Zawhna chhangin FCS&CA Director chuan Mizoram in Furpui a tawrh hun chhunga buhfai harsatna a thlen lohna turin Department-in theihtawp an chhuah tih a sawi a, Cyclone Remal-in buhfai an stock thenkhat tihchhiat nei mah se khawi hmunah mah harsatna thleng a awm lo niin a sawi a n ni. FCS&CA Department chuan Furpui lo thlen laia hmun thenkhat lirthei kalpawh theih lohna khuaa mipuiten ei leh bar an tlakchham loh nan buhfai mamawh tur ang zatte a chhekkhawl lawk a, kumin chhung hian Centre 61-ah Monsoon Stocking neih niin, heng Centre hrang hranga buhfai mamawh chhekkhawl zat chu qtls. 1,53,048.00 a tling.

FCS&CA Department tarlan danin, tun dinhmunah an Department hnuaiah Supply Centre 120 awmin, heng Centre-a godown awm zawng zawng belhkhawm hi 143 a ni a, Godown zawng zawngte capacity belhkhawm chu MT 45,780 a ni. 

Tun dinhmuna Mizoram-a Ration Card awm zat chu 2,89,926 niin, chuta mihring inziaklut zat chu 11,69,048 an ni a. Aizawl District-ah Ration Card 98,388 awmin, mihring awmzat 4,20,834 an tling a, Champhai District-ah Ration Card 18,825 awmin, mihring awm zat 77,856 an ni. Hnahthial District-ah Ration Card 5,220 awmin mihring awm zat chu 20,566 an ni a, Khawzawl District-ah Ration Card 9,321 awmin, mihring 39,548 an awm a. Kolasib District-ah Ration Card 22,514 awmin mihring 89,560 an awm bawk a, Lawngtlai District-ah Ration Card 25,951 awmin mihring 97,913 an awm bawk.

Lunglei District-ah Ration Card 41,870 awmin mihring 1,53,516 an awm bawk a, Mamit District-ah pawh Ration Card 21,263 awmin mihring 85,611 an awm a, Saitual District chhungah Ration Card 10,293 awmin mihring 46,764 an awm a. Siaha District-ah Ration Card 16,348 awmin mihring awm zat chu 61,905 a ni a, Serchhip District-ah Ration Card 17,939 awmin mihring 74,975 an awm bawk a. Tunah hian hmun hrang hrangah Ration Card ennawn hna hi kalpui mek a ni bawk.