Home Department-ah tan an la nasa tih sawi

Home Minister K. Sapdanga chuan Sawrkarna an chelh hnuin Home Department chhungkuaah tan an la nasa hle tih sawiin, “Kalphung hluia hun rei tak a lo kal tawh avangin Department chhungah siamthat ngai thil tam tak awmin, an insiam rem mek a ni,” a ti.

Home Minister hian Inrinni khan Tuirial Bial chhunga Kawnpui, Hortoki, Mualkhang leh Khamrang bakah Kawnpui Police Out Post te tlawhin, “Kan ram leh hnam damlohna pakhat chu rinawmna kan hloh thin hi a ni,” a ti a. Tunhma chuan Zofate hi hnam rinawm, kawngka kalhna atan pawha thingfak hmang mai thin kan ni tih sawiin, “Khawvel hmasawnna leh changkannain min luhchhuah hnu hian Sawrkar pisa-ah te, ram enkawlna kawngahte, khawtlang inrelbawlnaah te, mahni hna zawn theuhah te rinawmna in hmun a chang tlem ta hle a, tanlak kan ngai ta hle a ni,” a ti a. “Kohhran huanga kan rinawm viau lai hian sawrkar hna leh sawrkar thil a nih chuan kan inthlahdah leh thin hi a pawi takzet a, kalphung thar mipui sawrkar chuan 'Ram rorelnaa Pathian ram tundin' kan tum avangin mipuite pawhin kan nitin nun leh midangten min hmuh phak loh chinah pawh Mizo kan nih ang leh Kristian kan nih angin rinawmna kan vawng tlat tur a ni. Rinawmna hi chhungkua, khawtlang, Ram leh hnam tan tan malsawmna a ni a, chu malsawmna dawngtu tur pawh chu keimahni bawk kan ni,” a ti.

Sawrkarna an chelh hnuin Home Department chhungkuaah pawh tan an la nasa hle tih Home Minister chuan sawiin, “Kalphung hluia hun rei tak kan lo kal tawh avangin Department chhungah pawh siamthat ngai thil tam tak a awm a, kan insiamrem mek a ni,” a ti a. Rinawm lohna ram leh hnam tan a pawi em em a, mipuiin an tuar bawk thin tih sawiin, “Mi fel tak tak karah mi inthlahdahte avangin kan lo hmingthat tawhna te pawh thai rehin a awm phah thin. Heng mi inthlahdah, mi rinawm lo te hi sawrkar chuan a thian thianghlim nual tawh a, an chungah thununna kan lek zel dawn a ni,” a ti a. “Ruihhlo avangin kan ram a rum mek a, chhungkaw tam tak kan tap a, kan thalaite nunna pawh a hek hle a ni. Mizoram hi ruihhlo tawlhna kawngpui pakhat a ni a, hei hi sawrkar thar chuan a ngaimawh takzet a, Central YMA pawhin theihtawp a chhuahin ruihhlo do kawngah hma a la mek a, sawrkarin a chhinchhiah bikah kumin chhunga ruihhlo mân ringawt pawh cheng vbc.160 chuang man a ni tawh. Hetiang zela Mizo thalai, a bikin Mizo mipate ruihhlo bawiha kan tan chhoh chuan kan hnam hi a ral zawngin a kal zel ang tih a hlawuhthawnawm hle a, tlawmngai pawl te, Kohhran leh Kohhran thalaite, tumah inthlahdah lovin tang ho zel turin ka sawm che u a ni,” a ti a. “A bikin chhungkaw nu leh paten mahni chhungkua theuh uap lum thar leh ila, chhungkaw inrelbawlna fel hi kan ram hian a mamawh hle a, heti lamah hian tan i la thar leh ang u,” a ti bawk.