Ruihhlo ngai mi 400 chuang Home-ah dah tawh

Central YMA Vice President leh Kumpuan Committee Chairman Prof. Lalnuntluanga chuan Ruihhlo do kawnga an hmalakna hnuaiah ruihhlo ngaiten ruihhlo an sim theihnan nikum December thla atanga kar hmasa thleng khan ruihhlo ngai mi 400 chuang Home hrang hrangah an dah thu a sawi.

Akashvani palai zawhna chhangin Prof. Lalnuntluanga chuan ruihhlo ngaiten ruihhlo an sim theih nan Mizoram Presbyterian Kohhran ten Counsellor-an pek kaltlangin Aizawl Tuikhuahtlang-a Central YMA Hall-ah ruihhlo ngai mi sang chuangte Counselling Class neih pui an nih tawh thu a sawi a, Ruihhlo ti lo tura inzirtina chu Mizoram hmun hrang hrangah Sub-Headquarters, Group leh Branch YMA ten theihtawp chhuah a an kalpui mek thu a sawi bawk. 

Central YMA Kumpuan Committee Chairman chuan tunlaiin zan rei tak tak thleng tleirawl khawlai a hmuh tur an tam thin thu sawiin, hemi avang hian Central YMA chuan ngenna a tihchhuah thu a sawi a, Branch YMA bakah Sub-Headquarters leh Group YMA tinte chu hemi chungchanga hma la tura an inngen thu leh kum lama naupang zawk te zan chhuak in thil him lo leh pawi an khawih thin avangin thalai leh kum lama naupang zawkte chu ruihhlo laka an him theihna tur atan ngenna hi tichhuak an nih thu a sawi bawk.