Serchhip District-a Veng leh khaw hrang hrangah Ration Card ennawn hna kalpui tan mek a ni
Food, Civil Supplies & Consumer Affairs Department in thuchhuah siama an tarlan danin Aizawl khawpui chhunga Ration card ennawn report thehluh hun tur Department lamin an siam a ral hnuah September 30, 2024 thleng khan Veng 34 in thehlut tawhin, Veng 49 in NFSA report hi Sawrkar-ah an la thehlût lo a. NFSA Committee-te hian an Veng theuhah an thlanchhuahte list te mipui ten awlsam taka an hmuh theihna hmuna târchhuak tur leh Veng chhung Whatsapp Group darh zau ah te târchhuak bawk tura tih an ni a, NFSA hnuaia awm phu, dinhmun harsate hmaih an nih loh nan Sawrkar chuan theihtawpa chhuah mek zel tih an tarlang a ni.
DCSO Aizawl East leh Aizawl West in an tarlan danin tun thlengin mitthi tawh Ration Card atanga paih tur hi AMC area-ah mi 1139 hmuhchhuah tawh niin endik chhoh mêk zel a la a ni. Thla ruk (6) chhunga Ration khul ngai lo chhungkaw 6500 vel hmuhchhuah tawh niin heng mite hian ration lak an mamawh lo ni a ngaih an ni a. Heng zinga NFSA quota la te aiah hian NFSA mamawhtute dah an ni ang. Lunglei Municipal Council huamchhunga Veng 24 atangin mithi tawh mi 1177 te hmuhchhuah ni tawh bawkin hei pawh hi enfiah chhunzawm zel tur a ni ang.
Serchhip District-ah pawh Ration Card ennawn hna hi tun thla atang khan kalpui a nih thu Serchhip District Civil Supply Officer (DCSO) Lalhmuakliana chuan LENKAWL a hrilh a, Serchhip DCSO chuan Ration Card ennawn hna hi Serchhip District chhung khaw hrang hranga NFSA hnuaia Selection Committee te chuan an kalpui dawn tih sawiin, an zawhfel theih hun tur erawh hriat theih ala ni lo tih a sawi a. Veng leh khaw hrang hranga Ration Card Var, a Eng leh a Pawl hmang te mek te chu an dinhmun enin siamthat ngai te chu siamthat tura ruahman a nih thu a sawi a ni.
Serchhip DCSO chuan he an hmalakna hi Serchhip District pawn lama an Bial chhungah te pawh an kalpui dawn thu sawiin, karleh lamah hi chuan Veng leh khaw hrang hrangah hmalakna hi kalpui tan theih an beisei thu a sawi a, Ration Card nei thei awm zat bituk erawh tih danglam ala awm rih lo tih a sawi bawk.
Tarlan tawh angin, October, 2024 thla atang hian Mizoram-a Ration Card Var hmangtu te Ration khulna rate chu buhfai kg. khat zelah Rs. 30 a ni tawh dawn a, hei hian Ration Card Eng leh Ration Card Pawl hmangte erawh huam lovin anni hi chuan ngai angin an la la thei dawn a, Ration Card Pawl hmang ten mi pakhata kg. 5 a thlawn a an dawn bakah kg. 3 an lâk belh pawh a man ngai, kg. khat zelah Rs. 15/- in an la khul thei dawn a ni.
FCS&CA Department chuan Retailer lawmman Mizoram Sawrkarin kg. khat zela Re. 0.50 a pêk thin chu kg. khat zelah 1.50-ah a tisang dawn ta a, hei bakah hian NFSA buhfai bikah pawh Retailerte lawmman kg. khat zela Rs. 1.80 atanga Central leh State Sawrkarin an intum sem (75:25) atanga State Sawrkar in a tum sak Re. 0.45 ni thin chu Rs. 1.50-ah tihsan a ni dawn bawk. Hei vang hian October, 2024 thla atang chuan bûk dik taka Ration buhfai sem turin Retailerte a ngen nawn leh a, mipuite pawhin an Ration buhfai lak chu a bûk a dik ngei em tih lo enfiah ve thin turin a ngen a ni.
Ration Card ennawn hi dik taka kalpui a nih zel theih nan sawi tur leh complain duh neite chuan NFSA Chairman, an bialtu DCSO ah te thlen thin turin sawrkar chuan mipuite a chah bawk a ni.
Comments
Post a Comment