Polling Station 5 te sawn tura rawtna pawm a ni

Serchhip District chhunga Polling Station pathum (3) te chu a awmna hmun sawn tura rawtna pawm a ni.

Serchhip District chhunga Polling Station hrang hrang siamthat ngaite chungchang ngaihtuahin nimin khan District Level Standing Committee on Rationalization of Polling Station chu an Chairman leh District Election Officer Paul L. Khuma hovin Serchhip DC Meeting Hall-ah an thukhawm a, 26/13-Serchhip-III a Polling Station atana hman Chhim Veng Primary School building a chhiat tawh avanga Govt. Modern Middle School CRC-a sawn rawtna te; 27/31 Vanchengte-a Polling Station hman mek Govt. Primary School chu a hmunhma a that tawk loh avanga Govt. Middle School-a sawn rawtna te; 28/10-East Lungdar-I Polling Station atana hman BDO Conference Hall chu a remchan loh avanga Buhzem Cluster Level Federation, SHG Building-a sawn rawtna te; 28/13-Chekawn Polling Station atana hman Govt. Primary School chu PwD voter te tan pan a remchan loh avang leh motor a luh loh avangin Govt. Middle School-a sawn rawtna leh 28/15-Bungtlang-II a Polling Station Govt. Primary School-I chu kawngpui atanga a panna a hlat deuh avang leh kum upa zawk leh PwD te tan pan a harsat avanga Govt. High School-a sawn rawtna te chu sawiho a ni.

Heng Polling Station hrang hrang sawn tura rawtna te hi Booth Level Officer (BLO) hova Political Party hrang hrangte thukhawm in an lo remtih tawh leh ERO/AERO ten a hmunhma te tlawha an lo zirchian a nih tawh angin pawm a ni a, Election Commission pawmpui turin CEO Mizoram-ah thlen leh tur a ni ang.

He thutkhawm ah hian Bawrhsap Paul L. Khuma chuan Polling Station fuh loh avanga mipuite tana harsatna awm thei te sawiin, Election Officer F. Lalnisai chuan heng rawtna te hi nakum-a VC Inthlanpui-ah chuan hman theih a beiseiawm thu a sawi bawk a ni