Samagra Shiksha leh IASE thawhdunna ziak

Samagra Shiksha leh Institute of Advanced Studies in Education (IASE) te chuan nimin khan Thawhhona Thuthlung an ziak.

Directorate of School Education Conference Hall-a Thawhhona Thuthlung ziahna hun leh Zirbingna Report tlangzarhna hun nimin-a neih hi Education Department changtu Minister Dr. Vanlalthlana chuan hmanpuiin zirna lama kan ram mamawh em em zirbingna (Research) pawimawhzia a sawi a, Vawiin-a Secondary School zirlai naupangte harsatna zirbingna hmanga report (Identification of Learning Problems of Secondary School Students In Mizoram) tlangzarh theiha chhawpchhuah a ni chu lawmawm a tih thu sawiin, Mizoram Education Reforms Commission-in implement ngam tura an intintuah a ngaih thu a sawi a. Zirchianna atanga a lan danin School zirtirtu semrual loh avanga Subject Zirtirtu indaih lohna awm thin chu pawi a tih thu leh a theih chin chinah School leh Zirtirtu data enchian a, semrual (rationalise) an tum thu a sawi a, khawtlang mipui leh nu leh pate pawhin an khaw School dinhmun chauh ngaihtuah lova, midang nena inkhaikhin thin turin a chah bawk a ni.

Education Minister chuan an sawrkar chhung hian data felfai tak hnutchhiah an tum thu leh kan ram zirna-in kan thatpuina tur a nih dawn phawt chuan beidawng lova hmalak zel an tum thu a sawi bawk a. National Achievement Survey (NAS)-ah kan performance a that theih lohna chhan chu zirbing a, theihtawpa hmalak dan turah ngaihtuahna seng turin he huna kalkhawmte chu a chah bakah report pekna lama tanlak a pawimawh thu a sawi bawk.

Nimin-a he hun hman ah hian Prof. Lallianzuali Fanai, Principal, IASE & Principal Investigator chuan Technical Report pein Report tarlan danin Mizoram District 11-a Zirna In 69-ah Zirlai 2983 te Questionnaire hmanga zawhna te hi chhantir an ni.