Larsap in KVK leh College of Vsc & AH a tlawh

Mizoram Larsap Indra Sena Reddy Nallu chuan nimin khan Krishi Vigyan Kendra (KVK), Aizawl leh College of VSc & AH, Central Agricultural University (CAU) (I), Selesih a tlawh.

Nimin-a KVK a tlawhna ah hian Governor hi Dr. Lalnuntluangi Hmar, Dean College of Vsc &AH, CAU(I), Selesih leh a thawhpui ten lo dawngsawngin KVK Conference Hall-ah an inkawm a, Larsap hian Faculty Member te chu an hmalak mek leh hmachhawp te theuh zawtin, thahnem ngai taka thawka, Mizoram Loneitute tan hmasawnna rahbi tuk sak ngei turin a fuih a ni. Loneitu leh huanneitu lo tel ve te hnenah pawh an hmalakna te zawtin, tam zawk leh hlawk zawka an thlai leh thei te an tharchhuah a, an dehral theih nan KVK lam mithiam te rawnna chang hre turin a chah a. Loneitu te pawhin tunlai thiamna mila an lo leh huan te, an ranvulh te an vulh theih nan Training a tel tam turin a chah a. KVK lam hotute hnenah pawh Ranvulh mi, Loneitu leh huan siam te tan Training hi uar zual sauh turin a chah bawk.

Larsap hian inkawmhona hun a hman zawhah KVK,Aizawl Exhibition Centre tlawh nghalin, KVK kaltlanga hmalakna hrang hrang te a en a. KVK, Aizawl Demonstration Farm te fangin hemi hnu hian College of Vsc &AH, CAU(I) Farm-a Ran chi hrang hrang vulhna Unit bakah Dept. of Livestock Production Management pawh a tlawh bawk a ni.