MSPMC ten Lengpui Airport-ah hnathawh an tlawh

Mizoram State Project Monitoring Committee chuan an Vice Chairman R. Lal Rinawma hovin Lengpui Airport cheithat hna thawh mek an enfiah.

Lengpui Airport tihchangtlun hnathawh kal mek hi MSPMC hian tun tum hi an vawi li (4) tlawhna a ni a. Heng atanga an thil hmuh leh siam that ngai nia hriatte hi MSPMC General Body Meeting-a an sawiho hnuah rawtna engemawzat chu a mawhphurtu Department hnenah an lo thlen tawh a. PWD, PHE, P&E leh Aviation Wing-te nen kumin April ni 16 leh 18 khan hemi chungchang hi an sawiho tawh bakah Contractor pahnih Zoramchhana leh KR. Construction-te chu kovin tha taka hna a kal zel theih dan turte an sawipui a ni. MSPMC te chuan tun dinhmunah hnathawh mekte a kal tha thawkhatin an hria a. Lengpui Airport tihchangtlun hna chu ruahman anga a puitlin theih nan a tul anga vil zui zel an tum tih an sawi bawk.

Lengpui Airport bakah Mizoram State Project Monitoring Committee Team-te hian NH. 44 (A)-a Tlawng lui kanna tur hnathawh mek an tlawh bawk a. He Lei hi Sawrkar laipuia Ministry of Road Transport & Highways hnuaia EPC Mode-a thawh niin, Contractor chu Poddar Infratech Pvt. Ltd., New Delhi a ni a, a sei zawng hi metre 545 niin cheng vaibelchhe 36 leh nuai 99 hnathawh nan ruahman a ni.