Ruihhlo hmansual vangin kumin ah mi 61 thi tawh

Kumin January atanga October 1, 2024 thleng khan Mizoram-ah ruihhlo hmansual vanga thi mi 61 an awm tawh.

Excise & Narcotics Department chhinchhiahna atanga a lan danin kumin chhunga Mizoram-a ruihhlo hmansual avanga thi zinga 53 chu mipa niin a dang pariat chu hmeichhia an ni a. Thi zinga 34 hi Heroin vanga thi an ni a, a dang 27 pawh hi Heroin leh thil dang tikawp an ni.

Chhinchhiahna atanga a lan danin kum 1984 khan Mizoram-ah ruihhlo hmansual avanga thi pakhat chhinchhiahin hei hi Mizoram-ah ruihhlo kaihhnawiha thi chhinchhiah hmasak ber a ni a, Heroin vanga thi a ni. Hemi atanga chhuta tun thleng hian ruihhlo avanga thi hi mi 1,873 an tling tawh a, an zinga mi 225-te chu hmeichhia niin midang 1648 chu mipa an ni. Mizoram-a ruihhlo vanga thi mi 1,873 zinga a tam ber mi 1,161-te chu tunhma a thalaite'n an hmansual nasat tak, nachhawkna chi khap spasmo proxyvon leh parvon spa vanga thi an ni a. Heroin vangin mi 267 an thi tawh a, damdawi chi hrang hrang khawih kawp avanga thi hi mi 445 an awm bawk.

Mizoram-a thalai ten an thihpui nasat Spasmo Proxyvon leh Parvon Spa te hi sawrkar in siamchhuah khap tawhin hei vang hian thalai te pawhin an thihpui zui tawh lo nia thudawn a ni.