Mizoram-ah COVID-19 kai hmuh tur la awm reng

Mizoram-ah COVID-19 hri a leng tawh lo mahse he hri hian khawvel a chen chilh tawh avangin a thawm hriat tur a awm deuh reng a, he hri kai hi Mizoram-ah pawh hmuh thar tur an la awm reng a ni.

Integrated Disease Surveillance Programme (IDSP) te’n an chhinchhiah danin, Mizoram-ah kumin hian COVID-19 hri vei mi 72 hriatchhuah an ni tawh a, October ni 1 thleng khan hti kai hmuhchhuah thar hi an la awm a ni. Kumin hian April leh May-ah COVID-19 hri kai hmuh thar an awm lo a, June atangin hri vei hriat thar an awm leh tan a. June-ah hian mi pakuain hri an vei a, July-ah mi 10-in kaiin August-ah khan hri vei zat nasa taka pungin mi44 lai hmuhchhuah an ni a, September-ah hri vei thar mi pathum an awm leh bawk a ni.

Kumina COVID-19 hri veite hian vanneihthlak takin an natpui em em lo a, thuneitute sawi danin, natna dang vanga enkawl, an awm danah ‘COVID-19 vei an ang e’ tih avanga endik an ni hlawm a. A tam zawk fe hi natna dang vanga damdawi In a enkawl lai an ni bawk. Tunhnaia he hri vei hriat tharte hi ZMC-a RT-PCR hmanga endik vek an ni. Hetianga COVID-19 hri vei hmuhchhuah an awm deuh reng avang hian hri a leng tihna a ni chuang lo tih Doctor-te chuan an ti a, hrileng reng reng a reh hnuah pawh a lo awm ngheh tawh avangin a hnuah a vei an awm thin tih an sawi a ni.