RD Department in an hma-lakna thlirletna hun an hmang

Rural Development Department chuan an Department hnuaia Scheme hrang hrangte District leh Block Level-a Officer te'n an kalpui dan thlirletna hun nimin khan Aijal Club-ah an hmang a, he hun hi RD Minister Prof. Lalnilawma chuan khuallian niin a hmanpui a ni.

He thutkhawm ah hian RD Minister Prof. Lalnilawma chuan Rural Development Department pawimawhna leh Department hmalakna thlirletna thutkhawm pawimawhna te bakah, Department hnuaia Officer-te fuihna thu a sawi a. Rural Development Department chu mipuite dawr tam ber Department leh hmuh theiha an hna thawhte lansarh berna Department a nih thu sawiin, Officer-te chu fimkhur taka hna thawk turin a chah a. Department hnuaia hnathawhte thlirletna thutkhawm neih thin chu Department tana a pawimawhzia tarlangin, thlen chin atanga hmasawn zel tur chuan kan thlen chin hriat chian chu tihmakmawh a nih thu a sawi a. Officer kalkhawmte chu Sawrkar kutke ber an ni tih hrethiam turte, inveng renga rinawm leh dik taka hna thawk turte a chahin, sawrkar kalpui mek 'Project Rotling' tihhlawhtlin kawngah theihtawp chhuahpui zel turin a sawm nghal bawk a ni.

He thutkhawm hi RD Department changtu Commissioner & Secretary R. Zarzosanga chuan kaihruaiin Rural Development Department hnuaia scheme hrang hrangte kalpui dan bihchian a ni a. State Cell MGNREGA kaltlanga District leh Block hrang hrangte dinhmun ngaihthlak a ni a. Directorate of Rural Development atangin BADP, PMKSY-WDC 2.0, SAGY leh SASCI kalpui dan thlirlet niin MzSRLM kaltlanga SRLM leh DDU-GKY kalpui dante pawh ngaihthlak a nih hnuah Social Audit Unit, MISSAAT, SIRD & PR, Project Director leh BDO thenkhat atangin an hmalakna ngaihthlak a ni bawk.