Health Minister in ‘TB Free Workplace Initiative’ a hawng

National Health Mission hnuaia hmalakna pakhat, National TB Elimination Programme leh Piramal Swasthya tangkawp buatsaih ‘TB Free Workplace Initiative’ chu nimin khan Health Minister Lalrinpuii chuan a hawng.

Mizoram Sawrkar Office, MINECO-a ‘TB Free Workplace Initiative’ hawnna hunah hian Health Minister chuan Mizoram hi TB umbona kawnga hmalaknaah India ram-a Model State ni turin Sawrkar laipuiin min rawn thlang tih sawiin, State dangte entawn tur kan nih avangin kan hmalak dan tur te hi uluk tak a kan duan a ngai tih a sawi a, hetiang hmalakna Innovative deuh mai Official ten an lo duangchhuak chu lawmawm a tih thu sawiin, theihtawp chhuaha TB umbo a nih theih nana thawhhopui ah Mizoram mipui zawng zawng a sawm bawk a ni.

Khawvel pum ah TB umbo beihpui hi thlak mek a ni a, Kum 2025-ah chuan TB natna tihrem hman tumin kawng hrang hranga hmalak a nih tawh hnuin ‘TB Free Workplace Initiative’ hi tun tum a hmalakna turin duan thar a ni leh ta a ni. He hmalakna kaltlang hian thawktute chuan damlo leh TB inringhlel te chauh endik tawh lovin, mipuite chu an hnathawhna hmuh ah kalchilhin a duh apiang tan Test hi kalpui a ni ang.

He hmalakna hnuaiah hian ‘Portable digital X-ray machine’ leh AI Assisted Diagnostic software hmangin TB vei leh vei loh hi Doctor ten rang takin an endik nghal thei dawn a. Nimin-a a hawnna neih a nih hnu hian nileng in MINECO-ah hian a duh apiang tan TB vei leh vei loh a thlawna in test hi an kalpui a, hnathawhna hmun hrang hrangah pawh la kalpui zel tur a duan a ni.