Sairang-a FCI Godown sak meka harsatna awm te Governor hovin Official ten an sawiho

Sairang-a FCI Godown sak hna chawlh lailawk mek chungchanga harsatna awmte chinfel theih dan tur chu nimin khan Mizoram Governor chuan Land Revenue & Settlement (LR&S), Environment, Forests & Climate Change (EF&CC) leh Food Corporation of India (FCI) hotute a sawipui.

He sawihona hunah hian Larsap Indra Sena Reddy Nallu chuan hmasawnna ruhrel pawimawh siam a nih hmain nakin lawka harsatna a awm loh nana fimkhur tlan a tul thu sawiin, hemi kawngah hian a kaihhnawih Department hrang hrangte inkarah thawhhona tha a awm a pawimawh thu a sawi a. FCI Godown chu Mizoram mipui tana pawimawh tak a nih avangin Sawrkar laipuiin a phut angte pawh a ranglama bawhzuia chinfel thuai tum tur leh FCI Godown sak hna tawpsan lailawk chu tan leh thuai a nih theih nana tan la turin Official-te a chah a. Project tan tawh leh kalpui mek, engemaw rokhawlhna avanga tawp lailawkte chu chinfela zawhfel thuai a tul thu a sawi bawk.

He hunah hian Sairang-a FCI Godown sak hna kalpui tawh dan leh thlen chinte, Forest Department atanga Riverine Reserved Forest (RRF) tia tawpsan rih tura hriattirna (stay order) pek chungchang leh Ministry phut anga hmalak ngaite sawiho a ni a. Hemi atana Compensatory Afforestation (CF) tur ram dawnfel a nih tawh thu tarlan a ni bawk a. FCI Godown sak mek chu Project pawimawh tak leh Mizoram tana tangkai tur a nih avangin tikhawtlai zel lova puitlin thuai a nih theih nana hmalak ho dan turte pawh sawiho a ni bawk.

He huna tarlan a nih danin Sairang-a FCI Godown sak hna hi kum 2021 vel khan FCS&CA Deparment ram Hectare 3.1 vela zau hawhtira bul tan a ni a. Buhfai Metric Ton 10,000 leng thei tura ruahman a ni a, building pathum sak tur zingah buhfai Metric Ton 5,000 leh Metric Ton 2,500 lenna tur building pahnih chu a sak hna zawhfel thawkhat niin, Metric Ton 2,500 leng building pakhat leh a kentel pawimawh dangte sak hmabak a la awm a ni.

Larsap hova hemi chungchang sawihona ah hian PCCF Ashok Kumar Biswal; LR&S Secretary Vanlalmawia; CCF NC. Saravanan; LR&S Director V. Lalduhzuala leh FCI-a Divisional Manager Zodinpuii Ralte leh Official pawi-mawh dangte an tel a ni.