Police suspend 59 zingah zu ruih vang tam

Tun sawrkar ZPM kaihhruai kal mekah Police hnathawk tha lo suspend mi 59 an awm tawh a, chung zinga a tam ber chu Zu ruih vanga suspend an ni.

Home Department tarlan danin, kumin January atanga August thlenga khan Mizoram-ah Police suspend mi 59 awm tawhin an zingah hian hmeichhe pakhat a tel a, mi dang zawngte chu mipa an ni a. Heng Police Suspend chhan tam ber chu zuruih vang niin zu ruih vanga suspend hi mi 29 zet an ni a. Zu case bakah hian damdawi (drug case) vanga suspend mi pahnih an awm bawk. Heng bakah hian Jail tang tichhuak pathum suspend an awm bawk a, discipline chhiat vanga suspend mi panga awm bawkin, Check Gate-a pawisa laa puh vanga Suspend mi pahnih an awm bawk.

Police Suspend dangte chu Leave kal zawm huna zawm lo te, duty laia tlan bo te, duty absent te, Arms & Ammunition chungchang vang te, Kuhva tawlhruk chungchang vang te, Gas tihchingpen vang te, thil ruk vang te leh Roll Call tlan bo vanga suspend te an ni.

Suspend chhan tam ber Zu ruih vanga suspend-te hi a tlangpuiin duty laia zu in an ni a, Office hun chhunga zurui te, Roll Call laia zurui te an awm bawk a; Magazine Guard Duty laia zurui suspend mi 12 zet an awm bawk.