Mizoram District thenkhat-a damdawi In-ah Palliative Care Unit kalpui a ni tawh

Natna benvawn hrang hrang avanga damlo, dinhmun hniam leh thih hlauhawma ding mekten rilru hahdam leh zangkhai zawka hun an hman theih nan sawrkar chuan Palliative Care Unit a din a, Mizoram-ah chuan Palliative Care hi Serchhip leh District thar pathum tih loh District dang zawngah chuan kalpui a ni tawh nia thudawn a ni.

National Health Mission (NHM) hnuaiah National Programme for Palliative Care (NPPC) hi kum 2016 atangin Mizoram-ah kalpui niin kar kalta Zirtawpni, October 11, 2024 kha ‘World Hospice & Palliative Care Day’ a ni a, he ni hi dinhmun hlauhawma ding mek damlo leh an chhungten nun nuam leh hahdam zawka hun an hman theih nana inenkawlna leh hemi kawnga inzirtirna ni atana hman thin a ni. Palliative Care in a tum ber chu Cancer mai ni lo, natna benvawn hrang hrang avanga damlo, dinhmun hniam leh thih hlauhawma ding mekten rilru hahdam leh zangkhai zawka hun an hman theihnan, an na tawrh damdawi hmanga chhawk zangkhai sak a nih theih nan bakah anmahni enkawltu an chhungte thlenga nun nuam leh hahdam zawka an awm theih nana hma lakpui a ni a. Serchhip leh District thar pathum tih loh Mizoram District dang zawngah chuan Palliative care hi kalpui a ni tawh a. He hmalakna hnuaia thawktute chuan Palliative Care Unit-a awmte chauh ni loin, damlote an chenna In ah tlawhchhuakin damdawi leh hmanrua nen an buaipui thin a ni.

NPPC tarlan danin, sawrkar kum 2024- 2025 chhung hian Palliative damlo mi 2224 en a ni a, an zinga damlo 1155 chu admit niin Palliative damlo thar 366 an awm a. Home Visit tum 301 nei tawhin, Palliative enkawlna dawng chunga In lama thi 88 awmin, damdawi In-ah mi 61 an thi bawk a. Tunah hian Palliative Care mamawh tan Mizoram State Cancer Institute-ah khum 10 leh Civil Hospital Lunglei-ah Khum 8 hauh (reserve) a ni.

NPPC Aizawl East District Nodal Officer Dr Lalfakzuala chuan Cancer leh natna benvawn khirh zual, HIV/AIDS, Kal tha lo, Thin tha lo bakah natna dang veituten hrehawm taka na an tawrh lohna turin Palliative Care Programme hi kalpui a ni tih a sawi a. “Cancer vei zaa 70 hi na hrehawm tuar niin zaa 90 hi nachhawkna nena enkawlna dawng an ni. Chutih laiin zaa 30 hi na tak tuarin mual an liam nia chhut a ni a. Hei vang hian Hospice & Palliative Care pawimawhna a sang hle,” a ti.