BRO hnathawh hawn thar zingah Mizoram a mi tel

Union Defence Minister Rajnath Singh chuan State leh Union Territory 11-a Border Roads Organisation (BRO) hnathawh 75 te chu Inrinni khan hawngin heng zingah hian Lawngtlai to Diltlang Parva Road a Lei siam chu a tel a ni.

Heng Project 75 te hi Defence Minister chuan Sikkim atanga hawngin heng zingah hian inkalpawhna kawng 22, Lei dawh 51 leh Project dang pahnih, helipad leh Chenna In pakhat ve ve te a tel a, a vaiin cheng vbc. 2236 hu a ni a. BRO hnathawh hi ram venhim hna thawktu sipaite tan chetvel a tih awlsam phah dawn hle a, kumin chhung hian BRO hnathawh 111 hawnna niin, nikum khan Project 125 hawn a lo ni tawh bawk a ni.

BRO ten ramchhunga hmasawnna ruhrel hrang hrang an siam Defence Minister-in a hawn zingah hian Mizoram-ah pawh Lawngtlai to Diltlang Parva Road-a Lei siam chu hawn a ni a; hemi pual hian Inrinni zing khan Chief Engineer Pushpak Office, Thuampui-ah hun hman a ni a. He bakah hian he hun hman hi Mizoram Governor Dr. Hari Babu Kambhampati chuan Raj Bhavan atangin biak hmuh theihna kaltlangin a telpui bawk a ni.

Inrinni-a hawn tak BRO Project 75 zinga pahnih te hi Project Pushpak, Aizawl hmalaknate niin Mizoram chhungah pakhat, Metre 125-a thui Ngengpuilui Bridge, Lawngtlai-Diltlang-Parva Road bakah Andaman and Nicobar Islands-a North-South Road-te a ni a. Ngengpuilui Lei dawh hawn tak hian Parva leh a chhehvel Indo-Bangladesh leh Indo-Myanmar Border-ah te inkalpawhna tha zawk a pe thei dawn a ni. Project Pushpak, Aizawl chuan kum kalta chhung khan project 6; kawngpui 3 an siam bakah Lei 3 an dawh zo a ni.