Nov. 5-ah Sinlung Hills Council inthlanpui nei dawn

Seat 12 awmna Sinlung Hills Council inthlan vawi 2-na chu thla thar November 5, 2024 khian neih a ni dawn.

Mizoram State Election Commissioner Dr. H. Lalthlangliana chuan nimin khan a Pisa-ah thuthar thehdarhtute kawmin Sinlung Hills Council inthlanpui vawi 2-na chu November 5, 2024 khian neih a nih dawn thu leh hemi Model Code of Conduct hman tan nghal a nih thu a puang a. State Election Commision chuan inthlanna felfai leh muanawm tak kan neih theih nan inthlanna buaipuitu Official-te, Political Party te, Media, NGO te leh Sinlung Hills Council chhunga mipuite tawiawmna a ngen a. Mipui duhthlanna kaltlanga Sinlung Hills Council inrel-bawlna tha tak kan neih theih nana theihtawp chhuah theuh turin mitinte a sawm bawk a ni.

Sinlung Hills Council term dinglai hi thla thar November 21, 2024 khian a tawp dawn a, hei vang hian Inthlanpui thawh hnihna hi Bial 12-ah neih a ni dawn a, Inthlanpui neih tur atan hian chuh tumte tana hming pekluh hun hawn nghal niin October 10,2 024 tlai dar 3:00 thlengin he inthlan chuh tumte tan hming pekluh theih a ni dawn a, hming pekluh te chu Oct. 11, 2024-ah enfiahin October 14, 2024 tlai dar 3:00 thlengin inhnuhdawk duhte tan hun hawn leh a ni anga, November 5, 2024 zing dar 7:00 atanga tlai dar 4:00 thlengin Vote thlak a ni anga, Vote thlak zawhfel a nih veleh Constituency tin Hqrs. ah te Vote tla hi chhiar tur a ni ang.

SHC inthlanpui neihna tur hi Aizawl, Kolasib leh Saitual District huamchhungah te niin Vote nei mipa 11,875 leh hmeichhia 11,914, an vaiin 23,789 a awm a, kum 2019-a inthlanpui aiin Vote nei thei hi 2,875 in an tam zawk a. Bial 12-ah Inthlanna hi neih tur niin Aizawl District hnuaiah Bial 6, Saitual District-ah Bial paruk leh Kolasib District-ah Bial pahnih a awm a ni.