Larsap in Tuirial-a bawlhhlawh sawngbawlna a tlawh

Mizoram Governor Indra Sena Reddy Nallu chuan niminpiah chawhnu khan Tuirial-a Solid Management Centre (SWMC) chu tlawhin helai hmuna hmalakna hrang hrangte a enpui.

Governor hian Solid Management Centre (SWMC), Tuirial-a Mechanical Compost Plant, Vermi Compost Plant, Waste Resource Center, Waste Incinerator, Common Bio Medical Waste Treatment Plant leh Temporary Holding Area-te tlawhin thawktute a kawm bawk a, khawpui thang zelah hnawm a pun chak avangin a nih dan tur ang taka hnawm lakkhawmte sawngbawl a tul thu a sawi a. Hmasawnna ruhrel lian leh pawimawh tak takte enkawlzui leh tuaihnum kawngah tanrual a tul thu sawiin, harsatna a awm a nih pawhin kan zavaia kan ngaihven tlan a tul a ni, a ti bawk.

Tuirial-a Solid Waste Management Centre hi Urban Development and Poverty Alleviation Department hnuaia State Investment Programme Management and Implementation Unit (SIPMIU) hmalaknaa North East Capital Cities Development Implementation Programme (NERCCDIP) hmanga sak niin kum 2019 khan hawn a ni a, kum 2022 khan AMC kutah hlan a ni. 

AMC tarlan danin SWMC-ah hian Aizawl khawpui chhunga hnawm sakhat te hi Pathianni tih loh kartluan-a phurhluha sawngbawl thin a ni a, hemi tur hian AMC chuan thawktu 35 a ruai a ni. Nitin hnawm paih Truck 190 vel te'n bawlhhlawh Ton 119.42 vel zet Tuirial-a SWMC-ah hian an chhungkhawm thin a; heng zinga Ton 89.09 hi bawlhhlawh hnawng (wet waste) niin, a dang Ton 30.33 hi bawlhhlawh ro (dry waste) a ni. Hengte hi sawngbawl niin nitin dry waste Ton 7.98 vel hi hmannawn (recycle) leh theih turin AMC pawmpui Scrap dealer 11 te hnenah hralh thin a ni a, wet waste-te hi Mechanical Compost Plant hmangin kumin March thla atang khan leitha ah chantir zel a ni.