Ningani-ah Sinlung Hills Council inthlan puan tum

Sinlung Hills Council (SHC) Inthlanpui vawi hnihna neih hun tur chu tunkar Ningani hian State Election Commissioner H. Lalthlangliana chuan a puang dawn a, Ningani chhun dar 12:00 khian chanchinbumite kawmin Sinlung Hills Council inthlan chungchang hi a puang dawn a ni.

Member 12 awmna Sinlung Hills Council inthlan hi November thla bul lama neih rin a ni a, kum 2019-a Inthlanpui vawi khatna neih ah khan MNF 5, HPC 5 leh Independent 2 an tling a, tun Term ah hian Executive Council tum thum siksawi a ni.

Tun hmaa Sinlung Hills Development Council tih thin kha April 2, 2018-a HPC (D) leh Mizoram sawrkar inremna thuthlung zul zuiin Sinlung Hills Council tia a hming thlakin thuneihna sang zawk pek a ni a. Hemi atan hian July ni 5, 2018 a pawm tak Sinlung Hills Council Act, 2018 hmangin Sinlung Hills Council hi din a ni.

Sinlung Hills Council-in a huamchin chu kum 1988-99 chho vela HPC-in District Council an ngiat chin tlangpui kha a ni a, District Council hrang ngiatna avang hian HPC lo dingin ralthuam hial an lek hnuah July ni 27, 1994 khan Aizawl-ah Mizoram sawrkar nen inremna thuthlung an ziak ta a. August ni 27, 1997 khan Sinlung Hills Development Council piangin he inremna a lungawi lo thenkhat chuan HPC (D) dinin an rammu leh a, kum 2018 a inremna siam a nih leh hnuah Sinlung Hills Council hi a lo piang leh ta ni.