Kumin chhungin TB vei mi 1,628 hmuh an ni tawh

Kumin January atanga August inkar chhung khan Mizoram-ah TB rinhlelh exam 15,907 awmin TB vei hmuhchuah 1,628 an awm a, TB vei tihdam zat chu za zela 80 a ni.

Health Department thuchhuah tarlan danin kumin January atanga August inkar chhung khan Mizoram-ah TB kai nia rinhleh mi 15,907 enfiah niin heng atang hian TB kai mi 1,628 hmuhchhuah an ni a, hemi chhung hian TB dam har chin tia sawin, MDR-TB vei thar mi 92 an awm bawk a, TB leh HIV vei kawp mi 176 awmin inenkawl laia thi 95 an awm bawk a ni. Tun dinhmunah Mizoram puma mi 127 chu MDR-TB vei niin TB vei zinga mi 155 chu kum 14 hnuailam an ni a. TB veite hi kum 30 atanga kum 45 inkarah mipa an tam a, hmeichhia ah kum 15 atang kum 30 inkar an tam thung a. Kum liamta 2023 chhung khan Mizoram-ah TB vei 2013 an awm a, TB vei zinga zaa 12 te chu HIV vei kawp niin TB damlo enkawlna la mek mi 1,620 an awm bawk a ni.

State TB Officer  Dr. Febiola Kharkongor chuan Sub-Centre a TB damdawi dah lailawk thin a mumal lohna chhan ber chu Central atanga TB damdawi rawn thleng a khaihlak nasat vang a nih thu leh hei bakah hian Sub-Centre ah damdawi dahthatna mumal a awm loh thu te, TB damdawi pangngai tak dahkhawl thei tur chuan Sub-Centre thuam that leh boruak lum leh vawh zawng dik tak hnuaiah dah a ngaih a sawi bawk.

Kar hmasa khan North Eastern Development Financial Corporation Ltd.-in TB damlo chhawmdawlna hnuaiah damlo 100 te chu chawtha hmanga tanpuina tur tlangzarhna Health Minister Lalrinpuii hovin hman a ni a, NEDFi hian thla 6 chhung chu TB damlo mi 100 an chhawmdawl dawn a ni. TB veite hi chhawm-dawltu an awm chuan thla tin Rs. 700 man chaw tha leisakin a reilo berah thla 6 chhung tanpui thin an ni.