MZP in Pension tawh ruai nawn lo tura hmalak rel

Mizo Zirlai Pawl (MZP) chuan tunhnaia sawrkar Department hrang hranga Officer Pension tawh rawih nawn leh pension tawh mai tur ruai nawn tura File kal lai a awm nia hria-in, hmalak an tum tih an sawi.

MZP General Hqrs. hian Inrinni khan Executive Committee thutkhawm vawi 636-na neiin Mizoram sawrkar hnuaia hna thawk zingah pension tawh rawih nawn an awm fo thin chu tunhma atangin tha an tih loh thu an sawi fo thin thu leh Pension tawh rawih nawn a nih avanga bang tura nawr pawh a lo nei zauh zauh tawh thin thu an sawi a. Sawrkar hnathawkte chu an hnathawh hun chhunga thahnem ngai taka thawk tura ngenin, an pension tawh hnuah erawh chuan thalai hna zawng mekte kian tur leh Officer Pension tawh, thiltih theih fal bik avanga inrawih nawn ang chi a awm loh nan theihtawp chhuahin hma an la zel dawn tih an sawi a. Tunhnaiah Officer Pension tawh rawih nawn leh pension tawh mai tur ruai nawn tura File kallai a awm nia hriain, hei hi uluk taka chhuichian a, pension tawh rawih nawn a nih loh nan chak taka hmalak nise an ti a ni.

MZP chuan October ni 27-a ‘Zirlaite Ni’ chu Pathianni a nih avangin Oct. 26-ah he ni pual hian ‘Ruihhlo Do kawngzawh’ chu Aizawl-ah neih nise an ti bawk.