SHC-a Nomination Paper thehluh pawm vek a ni

Thla thar November ni 5-a Sinlung Hills Council inthlan vawi hnihna lo awm tura chuh tum mi 50 te Nomination paper chu enfiah niin pawm vek a ni.

Seat 12 awmna Sinlung Hills Council Inthlanpui neih tura Nomination Paper thehluh te hi Zirtawpni khan enfiah niin he inthlanna chuh tuma mi 50 ten Nomination Paper an thehluh chu hnawl awm lovin pawm vek a ni a, Vawiin chawhnu dar 3:00 thleng hian inhnuhdawh theih hun hawn a ni. SHC Inthlanpui vawi hnihna neih turah hian rorellai ZPM leh Hmar People’s Convention (HPC) chu thawkdunin Bial 12 an chuh vek dawn a, ZPM-in Bial 8 leh HPC-in Bial 4 an chuh anga. MNF leh HPC (Reformed) te chu thawkdunin Bial awm zawng zawng an chuh dawn bawk a, Congress in Party mal-a Bial tin chuhin MNF leh Congress party hminga chuh tum hming pelut zingah Independent anga chuh an awm bawk a. BJP-in Bial 2, Khawlian leh Phuaibuang an chuh dawn bawk a, a dang zawng chu Independent a chuh an ni.

Sinlung Hills Council Bial 12 zinga Bial 6 hi Aizawl District huamchhunga awm a ni a, Bial 4 chu Saitual District-ah awmin Kolasib District-ah Bial 2 a awm bawk a. Khawlian, Tinghmun leh Saipum Bial-ah te Candidate 6 an awm a, Phuaibuang Bial-ah Candidate 5 awmin Suangpuilawn, New Vervek leh Saiphai Bial-ah Candidate 4 theuh awmin Bial dang – Vanbawng, Ratu, Sakawrdai South, Sakawrdai North leh Zohmun Bial-ah te chuan kil thumin an inchuh dawn a ni.