Myanmar atangin raltlan rawn luh belh leh

Kar hmasa chhung khan Myanmar atangin Mizoram-ah raltlan 679 an lo luh belh a, tun dinhmunah Myanmar atanga Mizoram-a raltlan hi mi 33,712 vel an awm nia chhinchhiah a ni.

Home Department hotute sawi danin kar hmasa a Myanmar atanga Mizoram-a lo luh belh mi 679 te hi an vaiin Saitual District-ah dah an ni a. Hemi hmalam hian Saitual District-ah hian Relief Camp a awm lova, tunah chuan Relief Camp pathum siamin chutah chuan mi 89 an awm ta a, Relief Camp pawna an chhungkhat laina leh thian thate bel bakah mahni In luah leh mi hnuaia thawka awmchilh nghal mi 227 awm thin chu mi 587-in rawn belhin mi 814 an tling ta a ni. Myanmar atanga raltlan lut thar zinga mi 210 hi mipa an ni a, midang 247 chu hmeichhia niin naupang 222 an awm bawk. Heti hian a hmaa Myanmar raltlan 227 awmna thin Saitual District-ah hian mi 906 an awm ta a, mipa 274, hmeichhia 306 leh naupang 326 an ni.

Heti hian Mizoram-a sahimna zawnga lo lut Myanmar raltlan hi tun dinhmunah mi 33,712 an awm mek niin sawrkar chuan a chhinchhiah a, an zinga mi 16,704-te chu Relief Camp 132-ah an awm mek a, mi 17,005-te chuan laina leh thiante an belh bakah mi In luahte an ni a. An zinga mi 10,119 hi mipa niin hmeichhia 10,782 leh naupang 12,811 an awm bawk a ni.

Hetihlai hian September ni 21 hma lam mi 679-te an rawn luh belh hma chawlhkar-ah khan Mizoram-a Myanmar raltlan awm mekte hi tlem sawtin mi 928 in an tlem a, Siaha District atanga chhuak mi 921 leh Mamit District atanga chhuak 7 te an ni a. Khawiah nge an kal a, Myanmar ramah an let leh nge tih Home Department hotute chuan an hre lo a ni.