MSPMC in Quarry-a lung enfiah turin sample an la

Mizoram State Project Monitoring Committee chuan nimin khan Saitual - Saichal kawng a Vaibek ram quarry chu enfiahin, zirchian turin lung sample an la a, MSPMC Member Secretary Er. Lalthanzuala Ralte chuan a ho a ni.

MSPMC Member Secretary chuan he quarry-a lung hi a chang lo a, a pianpuizia anga rei tak a awm theih loh avangin kawngpui siam nan a hman tlak loh thu leh hetiang hi Indian Standard Code of practice-ah chuan hman phal a ni lo tih a sawi a. Mizoram University Civil Engg. Dept. a Asst. Prof.,  Er. H. Laldintluanga pawhin, he quarry-a lung chu ‘Sail rock’ a nih thu leh a pan avangin tui in reilote a chiahin an pianpuizia (properties) awlsam tein a inthlak thin tih a sawi a. Kawng siamna atan a hman tlak loh a, Fur a lo nihin chirhah a chang mai thin niin a sawi bawk.

He Quarry-a lung Sample te hi Er. Laltlanthangi Ralte Sr. EE, PWD, QCR&D Division leh Quality Control Team ten lain zirchian turin MPWD Central Laboratory, Zuangtui-ah an thawn dawn a. Quarry enkawltu Hming-sawithangi chuan lung hi August thla atangin NHIDCL-in an la tih a sawi a, lung hi hmun dangah an pek ngai loh thu a sawi bawk. 

Mizoram State Project Monitoring Committee (MSPMC) hian Mizoram chhunga sawrkar hmalakna hrang hrang an endik thin ah kumin August thla thlenga an thil hmuh then-khat te chu mipuite hmuh theih turin an tarchhuak bawk a. Heng zingah hian ‘Improvement and Upgradation of different facilities at Lengpui Airport’ hnuaia hnathawh mek an enfiah tawh an te; ‘Construction of Solid Waste Management Centre at Hualngohmun’ hnuaia hmalakna leh Kelsih-a ‘Ropuiliani Freedom Fighter Museum’ hna thawh mek te telin, an thil hmuh dan te an tarlang bawk a ni.