Northeast Skill & Entrepreneurship Conclave-ah tel

Ministry of Skill Development & Entrepreneurship (MSDE) leh Indian Institute of Entrepreneurship (IIE), Guwahati tangkawpin a buatsaih ‘Northeast Skill & Entrepreneurship Conclave, 2024’ chu nimin khan IIM Auditorium, Shillong-ah neih a ni a, LESDE changtu Minister Lalnghinglova Hmar chu he hunah hian a tel a ni.

He Conclave-ah hian LESDE Minister chuan Mizo thalaite’n Infiamna, Music, Hospitality, Beauty & Wellness, Service leh thildang ah eizawnna tling thiamna leh theihna (skill) an nei tih a sawi a. Sawrkar laipui hnuaia Skill Development Scheme ah te India ram pum hrut rual lovin, Mizoram leh Northeast thalaite tuina leh thiam zawng mila kalpui a pawimawh thu a sawi a. State te chu an thalai leh mipuite azira Job role thlanga kalpui turin zalenna zau zawk pek nise tiin a rawt a ni. Northeast thalaite’n theihna sang tak an neih thu pawh Minister chuan sawiin, an theihna t ihmasawn a, hlawhtlinna tluantling an neih theih nan Northeast-ah Skill Training Centre changtlung neih belh pawimawh a tih thu a sawi bawk.

He Conclave-a khuallian Union Minister for MSDE Jayant Chaudhary chuan India chu ram zau tak, a mi chengte pawh inang lo tak tak kan nih avangin Skill Development & Entrepreneurship pawh State te nen inrâwn chunga kalpui a ngai tih a sawi a. Industrial Training Institute (ITI) te chu Skill inzirtirna pawimawh tak an nih avangin India Sawrkar pawhin a ngaipawimawh a, ITI 1,000 tihchangtlunna tur kalpui mek a ni tih a tarlang bawk. 

Union Minister hian Indian Institute of Entrepreneurship (IIE), Guwahati kaltlanga Northeast India-a Entrepreneurship Development Centres 30 din te chu nimin-a he hun hman ah hian a hawng nghal bawk a ni.