Mizoram-a infiammi 416 te hnenah cheng vbc. 1.10 chuang semchhuah a ni

Mizoram-a infiammi 416 te hnenah niminpiah khan chawimawina Tangka fai, Incentive Cash Awards to Meritorious Sportsperson chu hlan a ni.

Khawvel huap leh India ram pum huapa Infiamna lama hmingthate chawimawina Tangka fai hlanna hun hi Aizawl-a Dawrpui Multipurpose Centre-ah neih niin Sports and Youth Services Minister Lalnghinglova Hmar chuan a hmanpui a, Mizoram Sawrkar chuan infiammite Ban-ah a kai dawn tih sawiin, “A bultan nan Bana Kaih (Handholding) Scheme hnuaiah Mizoram pum huapa Sports Coaching leh Talent Identification kalpui nan cheng vbc. hnih leh nuai sawmnga (vbc. 2.5) pawm a ni tawh,” a ti a. Sports-a kan thlen chin a la sâng tawk lo chungin, hnam leh hnam, ram leh ram intihsiakna chu Mizo hnam chawisân theihna hmanraw pawimawh tak a nih avangin tih tak taka Sports kalpui chu a tul takzet thu a sawi a. Sawrkar chuan Incentive Cash Award Scheme chu a ennawn mek thu tarlangin, Olympic discipline ni lo te pawh tel tura ruahmanna siam a nih thu a sawi a. Olympic Games, 2036-ah chuan Mizote a tam thei ang ber kan tel ve theihna turin beiseiawm Sports discipline thlûr bik neia Sawrkarin theihtawp a chhuah tur thu a sawi bawk.

Incentive Cash Awards to Meritorious Sportsperson hi April 1, 2023 atanga March 31, 2024 chhunga National leh International-a infiammi lawmman (Medal) dawngte hnenah sem a ni a. Incentive Cash Award hi Incentive Cash Award Scheme 2022 tlawhchhana siam niin, hemi hnuaiah hian Medal latu player te enkawl a, inelna an neih hmuna hruaitu Official te hnenah player te pawisa dawn zat atanga chhuta 25% chu Cash Award pek an ni a. Tun tuma Incentive Cash Award hi a vaiin Rs 1,10,92,000/- niin Infiammi 416-te hnena sem a ni a, heng Infiammite zinga 276 te chu mipa niin hmeichhia 131 an awm a, Contingent Official 9 an awm bawk a ni.

Chawimawina Tangkafai hi Discipline hrang hrang 15- Badminton, Basketball, Belt Wrestling, Boxing, Football, Hockey, Tennis, Sepaktakraw, Shooting, Table Tennis, Taekwondo, Volleyball, Weightlifting, Wrestling leh Wushu te a Gold, Silver leh Bronze Medal latu infiammi te hnenah sem a ni a. Chawimawina hlan zingah hian Lalremsiami (Hockey), Jeremy Lalrinnunga (Weightlifting), Lalruatfela (Weightlifting) leh Cindy Lalruatpuii Colney (Football) te chu International Level-a lawmman la thei an ni a. Mimal anga sumfai la hnem ber chu Hockey player Lalremsiami niin ani hian Indian Women Hockey Team-a tela a lawmman dawnte avangin Rs. 14,50,000 lai a dawng a, 19th Asian Games-a Bronze Medal a lak avangin Rs. 7,50,000 leh 2023 Women’s Asian Championship-a Gold a lak avangin Rs. 7,00,000 a dawng a ni.