Kumin ah Heroin man tam

Home Minister K. Sapdanga chuan kumin August thla thleng chauhva Heroin man zat chu nikum chhung zawnga man zat thuak a ni tawh niin a sawi.

Narcotic Drugs and Psychotropic Substances Act 1985 hnuaia Ruihhlo do leh a kaihhnawih a harsatna thleng thinte zirhona hun nimin-a ATI Auditorium, Aizawl-a neih a hmanpuina ah Home Minister K. Sapdanga chuan ruihhlo chu hnam ang pawh a Mizote nasa taka min runtu a nih dan a tarlang a. Kumin August thla thleng chauhva Heroin man zat chu nikum chhung zawnga man zat thuak a ni tawh tih sawiin, thalai ten an thihpui nasa hle tih a sawi a. Hengte avang hian ruihhlo dona ah pawh a hluar chhan buaipui mai piah lamah Kohhran leh tlawmngai pawl ang te, Sawrkar leh Court lam ang pawha thawhhona tha lehzual neih chu a kawng pawimawh ber nia a hriat thu a tarlang a. Eng emaw chenah, Mizote khawtlang anga kan kalphung thenkhat chu ruihhlo do kawnga harsatna siamtu a nih dan te sawiin, chumi lam hawi a zirhona buatsaih a nih chu tha a ti hle tih a sawi bawk.

He hunah hian Gauhati High Court-a Judge leh HCLSC-a Chairman Justice Nelson Sailo pawhin kalkhawmte hmaah ND&PS Act 1985 hriatchian pawimawhna leh eng dan pawh a tum ang taka kenkawh a pawimawh ziate a sawi a. Gauhati High Court Judge leh MSLSA a Executive Chairman Justice Michael Zothankhuma pawhin ruihhlo chu khawvel ramtin deuhthaw a buaipui a nih dan te, a dona kawngah chuan dan kengkawh thei tura tanrual chu sawt bera a hriat thute a sawi bawk a ni.

ND&PS Act 1985 hnuaia Ruihhlo do leh a kaihhnawih a harsatna thleng thinte zirhona hun hi F. Laltlansangi MJS chuan kaihruaiin Dr. HTC Lalrinchhana MJS, Registrar, Guwahati High Court, AB and Secretary, HCLSC chuan inlawmna thu a sawi bawk a ni.