PWD Minister in PWD leh NHIDCL hotute a kawm

PWD Minister Vanlalhlana chuan nimin khan a Pisa-ah PWD hotute leh NHIDLC aiawhte kawmin Mizoram-a kawngpui dinhmun a sawipui.

He hunah hian PWD atangin C-E-C Er. Lalrinkima Hnamte leh Chief Engineer Er. H. Zoramliana te telin NHIDCL atangin Regional Office, Aizawl-a Executive Director Vivendar Jokhar te an tel a, PWD Minister chuan Fur laiin Mizo-ram mipui ten kawng chhiat avangin harsatna an tawh thin thu leh a bik takin kan chakkhai lakna kawng ber Aizawl-Silchar kawng chhiat avanga harsatna tunhnaia kan tawh te pawh a hretu te vek an nih thu a sawi a. “He kan harsatna suhkiang tur hian tha thlah lova, theitawp inchhuah chhun-zawm zel ka duh a, chumi atan chuan a tulna piangah Mizoram PWD leh NHIDCL te pawh inrawn tawnin, inpuitawn thin turin ka ngen che u a ni,” a ti bawk.

He hunah hian Vivendra Jokhar chuan NHIDCL in Mizoram chhunga an hnathawh tawh chin leh an hmabak te report pein, Aizawl -Tuipang (Tipa) kawng phei chu 90% an thawh zawh tawh thu a sawi a, an la thawhlohna hmun tlem te awm pawh NHIDCL kutah ram hlan a nih lovang a nih thu a sawi a. Kumin June thla atang khan ram te pawh NHIDCL kutah a awm vek tawh a, an hmabak te pawh an thawk chhunzawm leh thei tawh ang tih sawiin, Aizawl-Silchar Road-ah pawh ngawrh taka hnathawh mek zel a nih thu leh nakum March thla ralhmain resurfacing pawh zawh hman an tum thu a sawi bawk.

He thutkhawm ah hian Lok Sabha MP Richard Vanlalhmangaiha leh Lunglei West bialtu MLA T. Lalhlimpuia te pawh an tel a, Lunglei-Tlabung Road dinhmun tlangpui leh mipui ten harsatna an tawh dan chu T. Lalhlimpuia hian tarlangin, NHIDCL-a Executive Director chu a rang lama hnathawh tur hmabak la awm te chu thawk vat turin a ngen bawk a ni.