Mizoram District-a a hmasa ber ni turin Serchhip-ah District MSCU Branch hawn a ni
Mizoram State Cooperative Union, Serchhip Branch hawnna hun Serchhip DC Pisapui Hall-a neih ah hian Bawrhsap chuan Mizoram State Cooperative Union, Serchhip Branch hawn a ni ta chu lawmawm a tih thu a sawi a. Cooperative Society hrang hrang te khaitu tur MSCU hruaitu thar te chu Society ding mek te leh lo la ding tur te tan an pawimawh a; an kalphung leh kal dan khalh ngiltu, Society hrang hrangte chawikangtu an nih a ngai dawn a ni, a ti. Hruaituten an thut chhan an hriat a tul thu sawiin, nihna an neih chhan an hriat loh chuan hmasawn lovin kal ngaihna hre loin a awm theih a ni, a ti a. An hmalakna puanzar tam te, hnathawh leh hmalakna endik (monitoring) te, thutlukna an siam dawnin midangte ngaihdan ngaihthlak a pawimawh thu te sawiin, Society te leh District hmasawnna turin inngaihtlawmna nen hruaitu tha nih tum turin MSCU Serchhip Branch hruaitu thar te a fuih a ni.
MSCU Serchhip Branch hawnna hun hi MSCU President K.Lalchamreia chuan kaihruaiin MSCU-a CEO K. Lalduhawma chuan Serchhip MSCU hruaitu thar te puangin Ex-Officio Director-ah District Cooperative Officer L. Lalzidingi a ni a; President ah H Vanlalhruaia, Chairman, Serchhip Consumer Cooperative Society Ltd.; Vice President-ah R Lianchhawna, Treasurer, Khawlailung Consumer Cooperative Society Ltd. leh Member Secretary-ah Miriam Lalramdinpuii, Cooperative Audit Officer, Serchhip te an ni a. Board of Directors atan Lalliana Sailo, Secretary, Baktawng Farming Cooperative Society Ltd.; Laltlana, Vice Chairman, Keitum Farming Cooperative Society Ltd. leh PC. Laldinpuia, Member, Serchhip Farming Cooperative Society Ltd. te an ni.
Mizoram District a MSCU Branch hawn leh din chungchang hi July 19, 2024 khan rel niin Registrar of Cooperative Society chuan a pawm a. District a Branch ding hmasa ber ni turin Serchhip District MSCU hi hawn niin District dangah pawh MSCU Branch te hi hawn zel tum a ni a. Mizoram State Cooperative Union hi kum 1975 khan ding tanin a dinchhan leh tum ber chu Mizoram-ah Cooperative Movement hmasawnna leh chakna tur te, Cooperative Society a tel te leh a ngaihventute zirtir leh training pek te a ni a. Sum leh pai an hmuh ang zelin a din tirh atanga Vawiin thlengin hmun hrang hrangah training an buatsaih thin a. Kumin chhungah pawh training hi vawi 27 an nei tawh a, Mizoram Sawrkar flagship program Bana kaih (Handholding) Scheme ah pawh tangkai hle tura beisei a ni.
Comments
Post a Comment