Tuialhthei atanga chhiah lak tihsan tawh chu a ngai anga kalpui a ni dawn

Chief Minister Lalduhoma chuan tuialhthei man-a Chhiah lak tihsan tawh chu a a ngai angin sawrkar in a hmang zui dawn tih a sawi a, tuialhthei man tihsan atanga sawrkar-in chhiah a lak zawng zawng chu mipui hmasawnna atana hman vek a nih tur thu a sawi bawk

Niminpiah-a Cabinet thutkhawm neih-a an thurel chungchanga thuthar thehdarhtu ten nimin-a a Pisa-a an kawmna ah Chief Minister Lalduhoma chuan October 16- Council of Minister thukhawmin tuialhthei man tihniam lo tura thutlukna an siam thu sawiin, “Diesel-ah VAT 10% in kan tisang a, Social Infrastructure & Services Cess leh Road Maintenance Cess-ah litre khatah Rs. 2 ve ve lak a ni. Diesel man hi litre khatah Rs. 80.30 atangin Rs. 87.99 ah pung,” tiin a lan danah chuan ‘In tisang nasa mange aw’ tih theih a nih thu a sawi a. Covid-19 hmaa Diesel rate kan lo hman thin chu lirte khatah Rs. 86.37 a nih thu sawiin, “Kan tipunna hi Rs. 1.62 chauh a ni a, kan tipung nasa hranpa lo. Hmarchhak State kan enkual a, keini aiin Sikkim, Nagaland leh Assam-te an la sang zawk,” a ti a. Petrol chungchang sawiin, “Petrol-ah hian VAT-ah 18%, Social Infrastructure & Services Cess leh Road Maintenance Cess-ah litre khatah Rs. 2 ve ve lak a ni. Covid hma-a a rate Rs. 101.30 a ni a, tuna kan tihpun hnu hian Covid hma aiin Rs. 2.09 in a la tlawm zawk,” a ti a, tipung ta viaua sawi hi rate hlui atanga chhut chuan Diesel-ah Covid hma aiin tlemin a pung a, Petrol-ah phei chuan a hniam zawk thu a sawi a ni.

Chief Minister Lalduhoma chuan tuialhthei man an tihpun chhan mipuiin hriatpui se an duh thu sawiin, “Tuialhthei atanga Cess kan lak zawng zawng hi mipui tan kan hmang vek dawn. Kan mamawh ngawih ngawih atan mipuiin litre khatah Rs. 2 thawh ve se kan ti a ni. Social infrastructure & Services Cess hi thil chi li atan kan hmang dawn a, Road Maintenance Cess hi kawng atan liau liau kan hmang dawn,” tiin Cess tlingkhawm hi thildang atan pawhpen theih a nih loh thu a sawi bawk.

Chief Minister chuan Social Infrastructure & Services Cess lak chu thil pali - Zirna tih hmasawnna, Zirna In tihchangtlun leh siam belh bakah a kaihhnawih hrang hrang; Mipui hriselna lam - damdawi In leh a behbawm dang siam belh leh tihchangtlun bakah thawktu lakna atan; Skill Development atana a zirna hmun siam belh tihchangtlunna atan leh Hmeichhe lam bik enkawlna - Women Hostel, Girls Residential School, Girls Polytechnic bakah Maternity Ward tihchang-tlunna thlenga hman tur a ni tih a sawi bawk.

Kawng kan buaipui chhan chu Fur khat daih loa siam a nih thin vang a nih thu sawiin Chief Minister chuan, “Kan kawngte hi kan hun hma lama Contractor hoin an thawh a, an la thawh zawh lohte a ni. Agreement-ah sawrkar lam chan a chhe em em a, bill-ah an induhsak nen. Pawisa an la teuh tawh a, tunah hian Contractor tam tak chuan ban daih ila an duh zawk em em a, kan ban chuan sum an lachhuak hnem tawh si a, a buaithlak a ni,” a ti.

Chief Minister chuan kawng kan neih that theihna atan mipui nen tangrual ila an tih thu sawiin, “Mipuite hian kawng siamna atan tuialhthei litre khatah Rs. 2 thawh ve se kan ti a ni. Chutiang a nih chuan, kawng a chhiatin mipuiin kawng siamna atan pawisa ka thawh ve tiin sawrkar an nawr ngam lehzual ang. Tuna kawngte hi chu kan hun hma siam vek a ni,” a ti a, an sawrkar hnua hnathawhte chu uluk taka vil zel a ni dawn a, a that loh chuan sawisel an inhuam thu a sawi bawk.

Hetihlai hian sawrkar thutlukna ngai-chang mektu NGO Coordination Commiittee leh Mizoram Commercial Vehicle Union (MCVU) hruaitute chuan sawrkar thuchhuak hi ngaih-tuahin an thukhawm ve leh dawn tih an sawi.