Mizoram Commercial Vehicle Union ten Oct. 14 atanga lungawi loh lantir an tum an thulh rih

Mizoram Commercial Vehicle Union (MCVU) chuan Oil man tihsan leh kawngchhia avanga an lungawi lohna lantirna atana October 14, 2024 atanga an lirtheite dintir an tum chu Chief Minister Lalduhoma ngenna avangin an thulh rih thu an sawi.

Mizoram Commercial Vehicle Union (MCVU) hruaitute hian nimin khan Chief Minister Lalduhoma chu hmuinan thilphut hrang hrangte hi an sawiho a, he inkawmna an neih hnua thuchhuah an siamah MCVU chuan Chief Minister hova an inkawmna chungchang hi tarlangin, Kawng chhe chungchangah Mizoram chhunga State PWD chan zawngah chak taka hmalak nise, a chhe zualpui ah sawrkar hmalakna mek bakah hmun hrang hrang Company hrang hrang ten an chan chinah chak taka hma la turin Chief Minister in a lo hriattir ang tih an tarlang a. Mizoram Commercial Vehicle Union (MCVU) ten Chief Minister an ngenna avangin September thla atanga Mizorama Oil man a tihsan chu a revoke (sut leh na) siam a nih thu he hemi avanga an lawm thu an tarlang bawk.

Mizoram Commercial Vehicle Union (MCVU) ten Oil man sang tihniam tur leh Kawng chhia siam hmanhmawh tura an ngenna chu Chief Minister hian Cabinet Meeting hmanhmawh thlak kovin October 16, 2024-ah rel a ni dawn tih pawh an thuchhuah ah hian tarlangin, Cabinet Meeting neih hnuah Oil man hi a chiang dawn nia an ngaih thu an sawi a. Hetiang hi a nih avangin Chief Minister in a ngenna avangin October 14, 2024-a Zoram puma Mizoram Commercial Vehicle Union (MCVU) din an tum chu an thulh rih thu an tarlang a ni.

Mizoram Commercial Vehicle Union (MCVU) chuan Mizoram District hrang hranga an member te leh anmahni thlawptute chungah lawmthu sawiin, “October 16, 2024 (Nilaini) a Cabinet Meeting in kan lungawina zana kan thilphut te an ti hlawhtling lo a nih chuan kan kal zel dan tur kan in hriattir leh ang,” an ti a. Mizoram mipui ten harsatna kan tawh mek sukiang tura theihtawp chhuaha sawrkar an nawrna leh kan hmalakna support tute zawng zawng chungah lawmthu an sawi bawk a ni.