Khamrang to Kawnpui kawng siam mêk enfiah leh

National Highway-06 huamchhunga awm Khamrang to Kawnpui kawng siam mêk chu nimin khan PWD changtu Minister Vanlalhlana chuan a hmunah a tlawh.

Tunhnaia kawng chhia avanga harsatna thlenna hmun Khamrang to Kawnpui kawng siam mek a tlawhna ah hian PWD Minister chuan kawng siam chu chak taka kalpui tur leh mipuite harsatna thlen lo thei ang bera hna thawk turin thawktute a fuih a, “NH-06 Kawnpui to Khamrâng hi Mizoram mamawh lâkluhna hnukpui a nih avângin a chhe rei thiang lo a, chak taka siam a tul a ni,” tiin “Contract hna reng reng, kawng siam a ni emaw, thil dangah pawh dawngdah taka hna thawk thinte sawrkârin a dim dawn lo,” a ti a. Mizoram State Project Monitoring Committee-te mit tlung lova hna thawkte chu an phu tawka an chung thu ngaihtuah a ni zel dawn tih pawh sawiin, “Mizoram sawrkar chu kalphung thar sawrkâr anih tawh avangin NH-06 pawh tun hma ang mai maia dawngdaha enkawl a rem tawh lo a ni,” a ti bawk.

Tun dinhmunah NH-06 hi duhthusam in siam hlei thei lo mah se, lirthei engpawh kal theiin enkawl chhunzawm mek a ni tih PWD Minister chuan a sawi a, “Kan chak lakna kawng ber a nih avangin englaipawha lirthei kaltlang theiha enkawl chhunzawm zel hi sawrkar chuan kan tum tlat a ni,” a ti a. Kumin ah Mizoram in Fur a tawrh nasat thu leh ruahtui tlak chhung a rei thu sawiin, “Tunah hian Aizawl khawpui hmun hrang hrangah kawng chhe zual thawmthat mek a ni a, ruahtui tla tam han ziaawm se a aia tha lehzuala kawng thawmthata siam a ni zel dawn a ni” a ti. Nimin-a kawngpui siam mek a tlawhna ah hian PWD Minister hi Adviser to CM (Technical) Er. H. Ginzalala MLA leh PWD-a CE (Highway) H. Zoramliana te chuan an tawiawm bawk a ni.