Mizoram-ah damchhung tang tur mi 57 awm

Mizoram-ah damchhunga Jail tang tur (lifer) mi 57 an awm mek a, October 17, 2024 thleng khan Mizoram-a Jail hrang hrang 10-ah mi tang 1,742 an awm a, awm thei zat aia mi tang tamna chu 356 zet a tling a ni.

Mizoram sawrkar-a Prison Department tarlan danin tun dinhmuna Mizoram-a dam chhunga Jail tang tur mi 57-te hi mipa vek an ni a, an zinga mi 56-te chu Central Jail, Aizawl-a tang niin midang pakhat hi District Jail, Lawngtlai-a tang a ni thung a, heng damchhung tang turte hi pawikhawihna liantham-a inhnahmhnawih te an ni hlawm a ni.

Mizoram-ah Jail 10 awmin chung chu mi 1,386 awm theihna a nih laiin heng Jail hrang hranga tang awm mek zat chu 1,742 an tling a. Central Jail, Aizawl chu mi tang tamna ber a ni bawk. Mizoram-a Jail lian ber, Central Jail, Aizawl hi mi tang 438 awm theihna a nih laiin October 17, 2024 thlenga tang awm zat chu mi 792 an tling a, tang awm thei zat an pelhna chu 354 zet a ni a. Mi tang 191 awm theihna Central Women Jail, Aizawl-ah tang 145 an awm mek bawk a. District Jail, Aizawl-ah tang 141 awmin, tang 90 awm theihna a ni.

Heng bakah hian mi tang 109 awm theihna District Jail, Lunglei-ah tang 141 awm mekin District Jail, Siaha-ah tang 73 awmin, he Jail hi tang 92 awm theihna a ni a. Tang 105 awm theihna District Jail, Champhai-ah mi tang 137 awm mek bawkin District Jail, Kolasib chu tang 134 awm theihna niin tang 104 an awm bawk a ni.

Hetihlai hian tang mi 98 awm theihna District Jail, Lawngtlai-ah tang 29 awm mekin District Jail, Serchhip chu mi tang 128 awm theihna niin mi 78 an tang bawk a, mi tang 96 awm theihna District Jail, Mamit-ah tang mi 102 an awm mek bawk.