Minister in State Drug Testing Laboratory hmang tangkai tura hma la turin thawktute a chah

Health & Family Welfare Department changtu Minister Lalrinpuii chuan State Drug Testing Laboratory chu a taka hman tangkai thuai a nih theih nan a tul anga hma la turin thawktute a chah.

Health Minister hian nimin khan MINECO-a State Drug Testing Laboratory chu tlawhin mihring hriselna enkawl nana damdawi kan hman te endikna tur State Drug Testing Laboratory bun a nih hnuah a tak a hman tan a la ni lo chu pawi a tih thu a sawi a. Hnathawktu indaihloh vanga damdawi endik ngai te Regional Drugs Test Laboratory, Guwahati-a thawn thlak zel a ni thin chu pawi a tih thu a sawi bawk. Minister chuan Ministry of Health & Family Welfare hnuaia ‘Strengthening of State Drugs Regulatory System’ kaltlangin State Drug Testing Laboratory building sak a nih bakah khawl tha leh changkang tak tak lei a ni chu lawmawm a tih rualin mipuiin an hman tangkai thuai theih nan thawktu indah vat a pawimawh thu a sawi a. A taka hman tangkai thuai a nih theih nan a tul anga hma la turin thawktute a chah bawk a ni. 

He hunah hian Food & Drugs Administration-a Joint Director Lalsawma Pachuau chuan Drugs Testing Laboratory Building hi Central Project - Strengthening of State Drug Regulatory System (SSDRS) atanga sum cheng vbc. 9 hmangin kum 2021 khan sak niin damdawi endikna khawl chi hrang hrang 36 a keng tel tih a sawi a. Hman mai theihin High Performance Liquid Chromatography leh Gas Chromatography chu rem fel tawh a ni. Tunah hian Drugs Testing Laboratory hi a taka hna thawk tur chuan thawktu lak belh a ngaih thu sawiin, tun dinhmunah thawktu Junior Analyst post 3, Laboratory Attendant post 2, LDC post 1 leh IV Grade post 2 te chu sawrkarah dil mek a nih thu a sawi bawk.

State Drug Testing Laboratory hi a nih dan tur a kalpui a nih chuan kum khat ah damdawi sample 1000 en ik thei tur a ngaih a ni a. A chhunga khawl awm te hi changkang leh chhuak thar ber berte an nih thu an sawi a. Kum 2022-23 chhunga damdawi endik tura thawnchhuah 121 atanga 17-te chu ‘Not of Standard Quality’ an ni tih hmuhchhuah a ni.