Lirthei lian ten tlan an tum loh an thulh leh

Mizoram Truck Driver Association (MTDA), Mizoram Tipper neitu leh khalhtu pawl leh Eirawngbawlna Gas phurtu Mizoram Indane Driver Welfare te’n Vawiin atanga lirthei din tir an tum chu an sut.

Thudawn danin Aizawl leh Silchar inkar kawngpui dunga Sairang leh Durlui inkar kawng chhe zual pui, lirthei tluk hlauhawm khawpa khuar chhe laite siamthat a nih hma chuan Vawiin, Oct. 14, 2024 atangin heng lirthei neitu leh khalhtu pawl pathum te hian tlan rih loh nise an ti a. Amaherawh chu helai kawng siam mektu Contractor chuan a chhe zual lai hi ni 2 chhunga siamthat vek a intiam bakah Mizoram Truck Owners’ Association hruaitute’n chak zawka kawng chhe zual lai siamthat a nih theih nan zing lam dar 8:00 leh tlai lam dar 5:00 inkar chhung kawngpui khar rih tura Police lam nen an inrem avangin nawrh hi an thulh ta rih a ni.

Nawrh an tum chungchangah hemi hma hian lirthei khalhtu pawl pathumte hian thuchhuah siamin tun thla ni 5 khan Sairang leh Durlui inkar kawng chhia hi October ni 9 hma a siamtha turin a siam hna thawktu NHIDCL hnuaia Contractor-te Chief Minister in a hrilh niin an sawi a. October ni 9 khan a hmunah an zuk en a, hmasawnna duhthusam hmuh tur a awm chuang lo niin an sawi a. Tunah hian Contractor-in ni 2 chhunga a chhe zual lai siamthat a intiam avang leh chak zawka hna thawh a nih theihna atana Police lamin chhuna kawng an dan pin dawn avangin an nawrh tum hi an thulh leh ta a ni. 

Hetihlai hian Mizoram Truck Owners’ Association hruaitute chuan tun dinhmunah Mizoram-ah tuialhthei hi a lo lut tha thawkhat ni a an hriat thu an sawi a. Heti chunga Filling Station lama lak tur a awm mang si lo hi a chhan ber nia lang chu Myanmar leh Bangladesh lama man to uchuak taka hralh a nih vang nia an hriat thu an sawi a. Hemi chungchang hi nimin tlai khan Supply Minister an sawipui a ni.