Kumin-ah Dengue kai mi 449 hmuh an ni tawh

Kumin January atanga October ni 6 thleng khan Mizoram-ah Dengue hri kai mi 449 hmuhchhuah a ni a, an zinga pakhat hian nunna a chan.

Health & Family Welfare Department hotute sawi danin hemi hun chhung hian Dengue vei ni a inringhlel 6,710 awmin an thisen endik sakin an zinga mi 449 chuan an vei a ni tih hmuhchhuah a ni a. Dengue hi Aizawl leh Lunglei District-ah a hluar hle a. Aizawl West District-ah Sample 2,496 endikin an zinga 168 chuan Dengue an vei a, Aizawl East District-ah Sample 1,958 endik zinga 109 in an vei a. Lunglei District-ah mi 1,578 endik zingah mi 149-in Dengue an vei tih hmuhchhuah a ni bawk. Thla 9 chhunga Dengue vanga thi pakhat hi Aizawl West District ami niin Department-in an chhinchhiah dan chuan Mizoram-ah Dengue natna thihpui hi mi 8 an awm tawh a ni. Health Department hotute chuan Mizoram-a Dengue natna hmuhchhuah hmasak ber chu kum 2019 khan niin kum 2020 leh 2021 kha Covid-19 hrileng avanga mipui an inkharkhip hun lai a nih avangin a darh lo tluk a ni a. Kum 2022 atanga hluar leh tanin mi 5-in nunna an chan phah a, kum 2023-ah mi 2 an thi leh bawk. Dengue vanga thite hi Aizawl District ami vek an ni. Nikum kha Mizorama Dengue vei hmuhchhuah tam ber kum a la niin mi 12,949 sample lak zinga 2,060-in he natna hri hi an kai a ni.