Tobacco Free Youth Campaign 2.0 hawnna nei

National Tobacco Control Programme (NTCP), National Health Mission, Mizoram buatsaih Tobacco Free Youth Campaign 2.0 chu nimin khan Health Minister Lalrinpuii chuan a Office Chamber-ah a tlangzarh.

Health Minister chuan kan rama zuk leh hmuam hluar lutuk avanga Cancer natna vei kan tam phah chu pawi a tih thu sawiin, naupang thangthar zawkte chuan he natna tihbaiawm tak thlentu pakhat Vaihlo chu hnar ngam a, an fihlim theihna tur chu kan zavaia mawhphurna a ni tih hre thar leh turin Zoram mipuite a ngen a. Zirtirtute chu an thawhna School theuhah an zirlaite vaihlo laka an fihlim theih nan tan la thar lehzual turin a chah a. ‘Tobacco free’ Zirna In a nih theih ngei nan hmala theuh tura a sawm bakah Department hotute chuan an enkawl Department chu Vaihlo awm lohna hmun a nih theih nan khawng taka dan kengkawh turin a chah bawk.

He hunah hian COTPA (Cigarette & Others Tobacco products Act) 2003 dan hnuaiah vantlang puipunna hmunah meizuk phal a nih loh mai bakah naupang (minor) hnenah hralh khap a nih thu te, zirna in atanga Yard 100 (91.44 metre) huamchhungah Vaihlo zawrh khap a ni tih leh khapna dan dangte chu uluk zawk leh khawng zawka kenkawh a nih tur thu sawilan a ni a. Tunlaia lar E-cigarette (Vaping) khapna dan Prohibition of Electronic Cigarettes Act (PECA) 2019 pawh sawilan niin he dan hian E-cigarette siamchhuah, khawlkhawm, phurhchhuah, sawimawi, ram dang atanga lakluh leh zawrhte chu a khap tlat a nih tih mipuite'n an hriat a pawimawh thu tarlan a ni a. Heng E-cigarette (Vaping) kaihhnawih PECA 2019 dan hnuaiah hian a offence a zirin Rs. 50,000 atanga nuai 5 thleng pawisa chawitir theih a nih bakah kum 5 thleng lung iI tan theihna a nih avangin he E-cigarette (Vaping) vaihlo thlak theitu anga lar hi Zoram mipuite hian kan hnar a ngaih takzet thu leh kan rama siamchhuah Tuibur-ah te pawh hian a that lohna thuziak (warning sign) tarlan vek ni se tih a ni bawk.

Mizote zingah Vaihlo, zuk leh hmuam hmang kan la tam hle a. Global Adult Tobacco Survey 2016 - 17 a neihin a tarlan danin 58.7% te chuan Vaihlo, zuk leh hmuam kan hmang mek a. Mithiamte chuan vaihlo, zuk leh hmuam hi ‘Ruihhlo tihna kailawn’ (Gateway substance) tiin ‘Tobacco Free Youth Campaign 2.0’ ah hian mipui hnena a tam thei ang ber awareness campaign (IEC te hmanga) neih tur a ni dawn a. Tobacco Free Educational Institution a tam thei ang neih belh a nih theih nan te, Tobacco Free Village a tam thei ang neih a nih theih nan te, Cigarette & Other Tobacco Product Act leh Prohibition of Electronic Cigarette Act hmanga a tam thei ang activity nei turin leh Social Media hmanga vaihlo, zuk leh hmuamtthat lohna zirtirna a tam thei ang ber puanchhuah a nih theih nan te hmalak a ni ang.