Khawvel hmundang rualin Serchhip District-ah ‘World Mental Health Day’ hman a ni

Nimin October 10, 2024 kha ‘World Mental Health Day’ niin Serchhip District leh hmun hrang hrangah he ni pual hian hun hman a ni.

Serchhip District-ah chuan District Mental Health Programme (DMHP) bultumin North Vanlaiphai-a School pahnih, Govt. North Vanlaiphai High School- eh A&M Grandchild School-ah te he ni pual hian hun hman a ni a, heng hun hi CMO Office atangin Lalramnghaka Kawlni chuan kaihruaiin DMHP atangin Lalnunruati, Psychiatric Social Worker chuan ‘Mental Health at Work’ tih thupui hmangin Zirlai kawlkhawmte zirtirna a pe a, rilru hrisel neih a pawimawh zia te, rilru hrisel nei tura hriat tur pawimawh hrang hrangte leh rilru hrisel nei tura mithiam te pan a pawimawh thu te a sawi aa, DMHP-a Clinical Psychologist Jane Zodingliani Lailung chuan lawmthu sawiin hun a hmang bawk a ni.

Aizawl-ah chuan Chief Minister Lalduhoma hovin Vanapa Hall-ah Volunteers for Community Mental Health (VOLCOMH) bultumin ‘World Mental Health Day’ hi hman a ni a, he hunah hian Chief Minister chuan kan ngaihtuahna kal dan ang zela lungchhiaa mittui tla mai thei leh hlim taka nui thei kan ni tih sawiin, “Rilru a hrisel loh chuan taksa a hrisel thei lova, kan dam khaw sei thu hi taksaah chauh ni lovin kan rilru lamah a innghat tel. Kan mut theih loh chhan tam takte hi kan rilru lama thil awmte vang a lo ni fo, kan suangtuahna zawk khan mu thei lovah min siam thin. Midangte ngaidam thei lo mihring hi an dam thei lo, ngaihdam hi damna a ni. Nitin hian duhthlan theih pahnih kan nei, hlim nge lungngaih tih hi? A thlangtu chu keimahni kan ni,” a ti.

VOLCOMH hi kum 1992 khan rilru hriselna zirtirna leh rilru lama natna laka mite venhim hna thawk tura mi tlawmngaite din a ni a, din a nih atang hian kumtin ‘World Mental Health Day’ hi an hmang thin a. Kum 2017 atang khan ‘Teen Mental Health Initiatives’ kalpuiin nn thawhpui tur zirlai intelkhawm Green Ribbon Club chu Higher Secondary School panga ah leh Pachhunga University College-ah te an din tawh bawk a ni.