Bank hman tangkai nan inzirtir nasat tul ti

Mizoram Larsap Dr. Hari Babu Kambhampati chuan mipuite'n Bank hman tangkai dan leh hamthatna awmte an dawn theih nana inzirtirna kalpui nasat a tul thu a sawi.

Reserve Bank of India (RBI) Aizawl Office-a General Manager and Officer in Charge T. Lhungdim; Deputy General Manager Navin Adarsh leh Manager Siddhara bakah Manager Captain Steve Lalthantluanga te chuan nimin khan Governor hi Raj Bhavan-ah kawmin Governor chuan, RBI hotute chu bultanna tur nei remchanglo te'n loan hmanga bul an tan theih nana an hnuaia Scheme pawimawh tak takte tun aia nasa lehzuala kawhhmuh thin turin a chah a, a mamawhtute chu panchilha an harsatna leh tanpui theih dan turte chena ngaihtuahpui turin a chah bawk a. Sawrkar Scheme pawimawh tak takte chu miretheite chawikan nana duan a nih avangin ngai pawimawh tura chahin, Financial Literacy Campaign in rah tha a chhuah em tih chena enzui thin turin a chah bawk.

He inkawmna ah hian RBI hotute hian Mizoram-a an hmalakna tlangpuite tarlangin, Financial Inclusion leh Financial Literacy Campaign an kalpui bakah Lead Bank Scheme Priority Sector Lending hnuaiah target za zela 40 an tihhlawhtlin thute, RBI in Unified Lending Interface a ruahman thute an tarlang a ni.

He huna tarlan a nih danin India ram State 10 leh Union Territory 6 te chu tunlai thiamna hmanga thlunzawm an ni tawh a. Mizoram-ah chuan Aizawl leh Serchhip District-ah hman tan tawh niin RBI hotute chuan District dang thlunzawm tuma hmalak mek ani tih an sawi bawk.