Hnalak tur sut a awm loh nan MZP in enzui zel an tum

Mizo Zirlai Pawl (MZP) General Headquarters chuan zirlai hna zawng mekte ti hnual thei zawnga hnalak sut a awm tawh lohna turin a en zui zel dawn tih a sawi.

MZP General Headquarters hian Inrinni khan thuchhuah siamin, Executive Meeting vawi 636-na in Commerce & Industries Department hnuaia Asst. Marketing Inspector post ruak pakhat hnawhkhah nana October ni 6, 2023-a Advertisement tihchhuah tawh, Written Exam pawh kumin July ni 19-a neih fel diam tawh; Hna diltu mi 102 atanga Interview tura koh mi 10 ten Interview tura Commerce & Industries Secretary Room an thlen tawh hnua hna lak cancel thut a nih chungchang chu an ngaihtuah a; kumin October ni 16 ralhma ngeia Interview tura koh tawh mi 10-te chu a ngai anga interview kalpui a nih theih nana hmala tura MZP in ngenna a lo siam tawh angin tih hlawhtlin a ni tih an thuchhuah ah chuan an tarlang a. Commerce & Industries Department chuan October ni 11, 2024 khan Asst. Marketing Inspector hna lak Interview tura tling tawh mi 10 te chu Calling Letter pe in October ni 16 khan Interview neih fel a nih thu an sawi bawk a ni.

MZP chuan Asst. Marketing Inspector hnalak chungchanga chak taka hmalatu, Commerce & Industries Department changtu Minister F. Rodingliana chungah lawmthu a sawi nghal a. Hetianga zirlai hna zawng mekte ti hnual thei zawnga hnalak cancel a awm tawh lohna turin an en zui zel dawn a ni tih an sawi bawk a ni.