Dodalna avangin inneihna tlinga Mizo Dan-a man inhlan pawm rawtna a hlawhtling lo

Kum 2023-a Mizoram State Law Commission-in Biak In thleng kher lova Mizo Dan-a Man leh mual inhlan inneihna tlinga pawm an rel chu Mizoram Kohhran Hruaitute Committee (MKHC)-in an dodal hnuah a puitling ta lo nia thudawn a ni.

‘Mizo inneih, inthen leh rokhawmna dan, 2024’ chu Mizoram Law Commission hmasa ber, R. Lalrinawma kaihhruaiin an buaipui tawh a, John Siamkunga Chairman a nih laiin enzui leh niin kum 2014 khan Mizoram Legislative Assembly-in a pawm a, February 13, 2015-ah hman tan a ni. Dan chu siam that leh a ngai nia hriat a nih avangin Lala Khobung kaihhruai Law Commission chuan an ennawn leh a, Central YMA, MHIP Gen. Hqrs. leh mimal atangte in siam that leh tihdanglam rawtnate an dawng a. Rawtna zinga an pawm langsar zingah inneihna chungchang a tel a, ‘tuna tih dan pangngai, biak In a inkutsuih chu la kalpui thoin, biak In thleng kher loa Mizo Dan-a man leh mual inhlan chu inneihna tlingah pawm ni se,’ tih telin August 4, 2023-a thukhawm Mizoram State Law Commission chuan Mizo inneih chungchang ah biak In thleng kher loa Mizo Dan-a Man leh mual inhlan chu inneihna tlingah pawm an rel a ni. 

Mizoram State Law Commission thuchhuak hi MKHC chuan duh lovin, an duh loh thu chu August 9, 2023 khan khatih laia Chief Minister, Zoramthanga hrilhin, Law Commission thuthlukna hi Chief Minister hnen a thlen hunah pawm lo turin an ngen bawk a ni. Thudawn danin MKHC-in Chief Minister hnena ngenna an thlen hnu hian Law Commission rawtna hi a zuzi chho a, tun thlengin ngaihtuah chhunzawm a ni ta lo a. Sawrkar thar, ZPM kaihhruaina hnuaiah pawh hemi chungchang hi sawi rik a ni chhunzawm ta rih lo nia thudawn a ni.