Mizoram-a lirthei zinga za zel 68 chu ke hnih nei a ni

Mizoram-ah kumin September thleng khan lirthei 3,18,191 a awm a, heng zinga 2,21,851 (69.72%) chu Aizawl District-a awm a ni a. Lirthei zingah Two Wheeler tam berin lirthei awm zat atanga chhutin 68.56% a tling phak a ni.

Transport Department chhinchhiah danin Mizoram-a lirthei awm mek 3,18,191 zingah hian DTO Aizawl (MZ-01) hnuaiah lirthei 2,21,851 awmin DTO pakhat hnuaia lirthei ziahlum tam berna a ni a, DTO Lunglei (MZ-02)-ah 26,759, DTO Siaha (MZ-03)-ah 8,266, DTO Champhai (MZ-04)-ah 16,772, DTO Kolasib (MZ-05)-ah 17,341, DTO Serchhip (MZ-06)-ah 11,135, DTO Lawngtlai (MZ-07)-ah 9,601 leh DTO Mamit (MZ-08)-ah 6,467 a awm a ni.

Mizoram-a lirthei awm zawng zawngah Two Wheeler tam berin, kumin September thleng khan 2,18,167 a awm a, hei hi Mizoram-a lirthei awm zawng zawng atanga chhutin za zela 68.56 zet a tling a. Car 52,940 awm bawkin bungraw phur chi (goods carrier) 22,849 a awm a, heng te hi Mizoram a lirthei tam zual niin Aizawl bakah Mizoram hmun dangah Motor Cycle/Scooter-used for hire (2wheeler taxi) 4,126 a awm tawh bawk.

DTO Aizawl-ah lirthei 2,21,851 a awm tawh lai hian Aizawl khawpui chhungah lirthei intlanchhawk kalpui chhunzawm zel a la ni dawn a, hriattirna pawh hi September 29, 2024 khan chhuah a ni a. Hetihlai hian lirthei intlanchhawk avangin lirthei a pun chak phah leh phah loh leh Aizawl-a motor intlanchhawkin kan ram economy-ah a tha lo zawnga nghawng a neih dan chu Transport Department atang zir chianna a la awm lo a, zir chiangtu tur pawh ruat a la ni lo a. Lirthei intlan-chhawk hman a nih hma kum ruk (2011-2012 atanga 2016-17) chhunga lirthei registered zat 60,416 a nih laiin intlanchhawk hman a nih hnu kum ruk (2017-18 atanga 2022-23) chhunga lirthei registered thar zat chu 1,26,697 a tling a ni.