Kristianna leh kan Culture hi rem takin a kaldun thei, inmil takin i kalpui tlat ang u - Chief Minister

Art & Culture Department leh Central YMA tangkawpin an buatsaih Chief Minister's Running Trophy vawi 13-na, Hnam Lam Intihsiak kharna chu Inrinni khan neih a ni a, he hun hi Chief Minister Lalduhoma chuan hmanpuiin, “Kristianna leh kan Culture hi rem takin a kaldun thei a ni,” a ti.

Dawrpui Multipurpose Centre-a Chief Minister's Running Trophy vawi 13-na, Hnam Lam Intihsiak kharna hunah hian Chief Minister Lalduhoma chuan hnamdangte laka hnam dang min nihtirtu chu kan zia, kan tawng, kan zai leh lam, kan nunphung leh kan tihdan hrang hrangte hi an ni tih sawiin, “Chu chu Pathian min pek a ni,” a ti a. Mihring hi awmreng mah ila kan hnam ziate hi a bo si chuan hnam bo kan ni mai ang tih sawiin, chuvang chuan kan tihdan tha tinrengte hi kan chhawmnung zelin, kan zahpui tur a ni lo, a ti a. “Kristianna hian kan hnam zia tam tak min thlaksak tawh a. Tunhma deuh chuan Mizo irawm chhuak hlate Biak In-ah kan sa duh meuh lo va, Khuang lakluh takngial pawh kan rem ti lova, Mizo incheiin kan inchei lut ngam mang lova. Vawiinah erawh chuan chung te chu a lo bo ta tial tial a, kan Kristiannaah kan hnamzia a lo leng chho tial tial ta. A nihna takah chuan Seki leh Tingtangte nena Pathian fak te hi Pathian thu nen pawh a inrem thlap a, Kristianna leh kan Culture hi rem takin a kaldun thei ni,” a ti a. “Khawvel huapin kristianna hi thlir ila, hnam ze mila kristianna an kalpuina hmun apiangah Kohhran hi a nghet a, Member pawh an pung chak thin. Kan Culture hian kan hnukah min man tlat a, kan ngaina theuh a ni. Kristianna nen inmil takin i kalpui tlat ang u,” a ti bawk.

He hunah hian Art & Culture Minister C. Lalsawivunga pawhin hnam changkang ten hmasawnna leh an hnamzia an kal kawptir thiam tih sawiin, hmasawnna ke pen nghet an nei thin tih a sawi a. “Kan kristianna leh kan hnam ze thate keng tlat chungin hma kan sawn tur a ni a, chu chu hmasawnna dik chu a ni,” tiin hnam zia ngaihhlut tlat a tul thu a sawi a. “Chief Minister tirhin hman ni lawk khan Istanbul-ah Cheraw zuk entir a ni a, hnam dangten hmuhnawm an ti a. An ngaihlu em em a ni. Kan hnam ziarangte hi an chhuanawm a ni tih hrereng ang u,” a ti bawk.

Chief Minister's Running Trophy vawi 13-na ah hian Khuallam leh Cheraw-ah YMA Branch ten inelna neiin YMA Branch 56 hming pe atangin Branch 42 an tel a; a pumpui-ah Chanmari West Branch YMA chu pakhatna niin Vaiva-kawn Branch YMA chu pahnihna an ni thung a. Khuallam bik-ah Vaivakawn Branch YMA chu pakhatna niin Chanmari West Branch YMA chu pahnihna leh Pawlrang Branch YMA chu pathumna an ni.

Cheraw bikah Chanmari West Branch YMA chu pakhatna niin Lamka Branch YMA, Manipur chu pahnihna an ni a, Ramthar Veng Branch YMA chu pathumna an ni bawk.