Dinhmun tha zawk ten dinhmun hnim kian se duh

Mizoram-a Ration Card siam mek chungchangah Supply Minister B. Lalchhanzova chuan dinhmun tha zawk ten anmahni aia dinhmun tha lo kian thiam se a duh thu a sawi.

Akashvani Palai zawhna chhangin Food, Civil Supplies & Consumer Affairs Minister B. Lalchhanzova chuan National Food Security Act hnuaia Mizoramin quota a neih mek chu 7,06,296 a ni tih sawiin, NFSA Mizoram in a neih mek chuan a mamawh leh a phu te huap zo ngei se a duh thu a sawi a, sawrkar chhawmdawl ngai chinte chu lut kim ngei se a duh thu a sawi a ni. Supply Minister chuan dinhmun tha zawk chhungkuain anmahni aia dinhmun chhe zawk kian thei se a duh thu a sawi a, NFSA Committee pawhin Party in duhsakna rilru paihin an Veng leh khua theuhah thlei bik nei lo in kalpui se tih chu Mizoram sawrkar duh dan a ni, a ti bawk.

Kumin October thla atangin FCSCA Department chuan Ration Card Var neite tan buhfai man a tipung a; buhfai sem leh hmasak ber atangin Ration Card Var neite buhfai khul man kg. khat-ah Rs. 30 a ni tawh ang. Tun dinhmunah Ration Card siamthat hna hi an la zo chiah lo a, buhfai man tihpun a nih rual chiah hian Retailer te lawmman pawh tihpun a ni a, tunhmain Retailer ten buhfai kg. khat-ah duli an hlawh thin a, hei hi buhfai sem leh atang chuan kg 1-ah Rs. 1.50 an hlawh tawh dawn a ni. Supply Department chhût danin Mizoram hian tunhma chuan a man tlawma buhfai pekchhuah vangin kum khatah cheng vbc. 135 vel a seng thin a, tuna ruahmanna thar anga kalpui a nih hunah chuan kum khat ah Rs. vbc. 80 vel a seng thung ang. Tunhma lama sawrkar sum sen tlak hniamna tur hi kum khatah cheng vbc. 63 vel a ni thei dawn a ni.