SHC Inthlanpui-ah Candidate 49 an awm dawn

Thla thar November ni 5-a Sinlung Hills Council (SHC) inthlanpui vawi 2-na lo awm turah Candidate 49 an awm dawn.

Sinlung Hills Council Inthlanpui vawi hnihna neih turah hian Bial 12-ah inthlanna neih tur niin October 10-a Inthlan chuh tumte tana hming pekluh hun tawp thlengin mi 50 in hming an pelut a, heng hming pekluh te hi October 11 khan enfiah niin an vai hian pawm vek a ni a. Tunkar Thawhtanni, October 14, 2024 tlai dar 3:00 thleng khan inhnuhdawhna hun hawngin hemi chhung hian BJP Candidate pakhat chu a inhnukdawk a ni. Sinlung Hills Council inthlan hmasak kum 2019-ah khan Candidate 41 awmin, tun tumah hian Hmeichhe Candidate pawh telin inhnukdawk pakhat a awm hnuah Candidate 49 in an chuh dawn a, heng zingah hian ZPM leh HPC tangdunin Seat awm zawng zawng 12 an chuh dawn a, MNF leh HPC-R in Seat 12 chuhin Congress pawhin Seat 12 an chuh dawn a, BJP in Candidate pakhat neiin Independent a chuh tur mi 14 an awm dawn ta a ni.

Sinlung Hills Council-a Bial 12 zinga Bial 6 hi Aizawl District huamchhunga awm niin Bial 4 chu Saitual District-ah a awm a, Kolasib District-ah Bial 2 a awm bawkin Khawlian, Tinghmun leh Saipum Bial-ah te candidate 6 an awm a, Phuaibuang Bial-ah Candidate 5 awmin Suangpuilawn, New Vervek leh Saiphai Bial-ah Candidate 4 theuh awmin Vanbawng, Ratu, Sakawrdai South, Sakawrdai North leh Zohmun Bial-ah te chuan Candidate pathum theuh an awm a. He Inthlanna lo awm turah hian vote nei mi 23,794 an awm a. Vote nei zinga 11,875 hi mipa niin hmeichhe vote nei 11,914 an awm bawk a ni.

Sinlung Hills Council hi July ni 5, 2018 atanga hman tan Sinlung Hills Council Act, 2018 dan tlawhchhana din a ni a. November ni 5, 2019 khan inthlanna hmasa ber buatsaih a ni.