PMAY kalpui mek niin hmalakna hi kalpui zel a ni dawn

Sawrkar laipui hnuaia Thingtlang mirethei In sak tanpuina, Pradhan Mantri Gramin Awas Yojana PMAY(G) chu Mizoram-ah pawh kalpui mek a ni a, tunah hian sawrkar laipui atanga sum hmuh za zela 70.03 chu pekchhuah a ni tawh.

Akashvani Aizawl thudawn danin, sawrkar kum 2023-24 atan Mizoram chuan PMAY atan hian kumin March thla khan cheng nuai 5178.75 a dawng a, State sawrkar chuan a hun takah sum hi pechhuak nghalin a hmanna tura hman nghal a ni. Rural Development Department Director K. Lalrohlua sawi danin, State sawrkarin a tum ve tur cheng nuai 575.42 chu tunah hian Finance Department lamah bawhzui mek a ni a, State Nodal Account lamah a luh thuai beisei a ni a, SECC 2011 data hmanga dawng tur ten an dawn fel hnuah Awaas plus 2018 a thlan chhuah ten In sak tanpuina hi an dawng mek a ni, a ti bawk.

PMAY hi Mizoram chhunga District 11-ah te kalpui vek niin, District pathum - Aizawl, Khaw-zawl leh Saitual-ah te chuan pawisa pekchhuah tur hi pek kim a ni tawh a, District dang pariat ah erawh pek kim a la ni lo thung.

PMAY (G) In sak tanpuina hi kum 5 dang atan pawhsei leh turin Union Cabinet chuan kumin August thla khan a pawmpui tawh a, kum 2028-29 thleng a huam ang. Tunah hian a chhunzawmna tur buaipui mek niin, BDO tin ten hemi atana a thawk tur VLAA te registration PMAY(G) portal ah an nei mek a, hemi tihfel a nih hun ah PMAY (G) dawng tur te hi thlan thar a ni ang.