Kum 10 chhungin thubuai 30,036 ziaklut; IPC-ah rukruk leh Non-IPC ah Zu kaihhnawih a tam

Mizoram Police chuan kum 10 kalta, kum 2014 atanga kum 2023 inkar chhung khan thubuai 30,036 an ziaklut a. Police thubuai ziahluh zingah hian IPC hnuaiah Rukruk Case a tam ber a, Non-IPC hnuaiah Zu khapna dan, Prohibition/MLTP Act bawhchhia an tam ber thung.
Police Record atanga a lan danin kum 2014-2023 inkar chhung khan Mizoram Police hian IPC hnuaiah thubuai 24539 an ziaklut a, Non-IPC hnuaiah thubuai 5497 an ziaklut bawk. IPC hnuaia thubuai ziahluh zingah hian rukruk thubuai chu tam berin case 8983 ziahluh a ni a, hei hi IPC atanga thubuai ziahluh zawng zawng atanga chhutin 36.60% a tling a ni. IPC hnuaia thubuai ziahluh zingah hian In rawk (burglary) chu pahnihna a ni a. Kum 10 kalta chhung vek hian Police chuan tualthah thubuai 288 leh pawngsual thubuai 435 an ziaklut bawk a ni.

Kum 2014-2023 chhung vek hian Mizoram Police chuan Non-IPC hnuaiah thubuai 5497 ziaklutin heng zingah hian Zu khapna dan bawhchhia chu tam berin case 2203 an ziaklut bawk a, Zu kaihhnawih case hi Non-IPC hnuaia thubuai ziahluh awm zawng zawng atanga chhutin 40% a tling a. Non-IPC zingah hian ND&PS Act bawh-chhiatna leh POCSO Act chu a langsar zual an ni bawk.

Chhinchhiahna atanga a lan danin IPC hnuaiah hian kum 2014-ah tualthah case 45 leh pawngsual case 125 ziahluh a ni a, hei hi kum 10 kalta chhunga a san ber tum a ni ve ve a. Rukruk case hi kum 2022 -ah 1447 leh In rawk case hi kum 2022-ah vek hian thubuai 1256 ziahluh ni bawkin kum 10 kalta chhunga a san ber tum a ni. Non-IPC hnuaiah hian Zu khapna dan bawhchhiat vanga man an tam ber kum chu kum 2021 kha niin hemi kum hian thubuai 417 ziahluh a ni a. ND&PS Act bawhchhia an tam ber kum chu nikum 2023 kha niin thubuai 274 ziahluh a ni bawk.