ASF hri leng mek State Disaster-ah puan a ni

Mizoram sawrkar Disaster Management & Rehabilitation Department chuan Vawk pul hri leng mek, African Swine Fever (ASF) chu State Disaster-ah a puang.

Niminpiah-a Sawrkar thuchhuah tarlan danin ASF chu State Disaster-a puan anih bakah State Disaster Management Authority (SDMA) hriatpuina in kum 2024-a khuarel chhiatna zingah ziahluh a ni a, SDMA State Executive Committee chuan ASF avanga Mizorama harsatna hrang hrang thleng leh sum hloh hi Disaster Management Act, 2005 hnuaiah State Disaster Response Fund (SDRF) atanga zangnadawmna pek an ni dawn a, a kalphung turah State leh Sawrkar laipui Disaster Response Fund kalpui danin hmalak a ni dawn tih an sawi bawk.

Hemi chungchangah hian AH&Vety Minister C. Lalsawivunga chuan kar hmasa Nilaini-a Vawk suat avanga zangnadawmna semchhuah phalna a tlangzarhna ah ASF hrileng chu Mizoram in an tuar nasat avangin State Disaster-a puan turin hma an lak thu leh Vawk thite sumdawnna a hmanga, zuar an awm thin chu tawp se a duh thu a sawi a, natna darh zel loh nan fimkhur theuh turin mitin te a chah a, Vawk vulhtute rilru put hmang siamthat a tul thu sawiin, ASF avanga Vawk thi te tuihawk luankawr, khama paih leh uluk lo taka phum ching an awm thin chu pawi a tih thu a sawi bawk a ni. ASF avang hian kuminah vawk 13,915 a thi tawh a, Vawk 23,337 suat ni tawhin Mizoram-a ASF hri a len tirh atanga Vawk thi leh suat chu 1,09,498 a tling tawh a ni.