'Bana Kaih Scheme' hnuaia hmalakna thlirho niin portal kaltlangin dilna 1314 a lut tawh

Mizoram State Policy Coordination Committee chuan nimin khan a tum khatna atan an hmalakna hrang hrang thlirletna hun hmangin 'Bana Kaih Scheme' kalpuitu tur Department 16 atangin Nodal Officer leh Assistant Nodal Officer-te an tel a. Bana Kaih Scheme portal kaltlangin dilna 1314 a lut tawh tih tarlan a ni.

Planning & Program Implementation Department Conference Hall-a he Review Meeting hi Mizoram State Policy Coordination Committee-a Vice Chairman leh Adviser to Chief Minister KC. Lalmalsawmzauva chuan kaihruaiin Bana Kaih Scheme-a dilna lut tawhte chu uluk taka zirchiang a, hlawhtlin ngei tum a theihna neite, tih tak takna nen a beih tumten an mamawh ang tanpuina an hmuh ngei theih nan Nodal Department-a thawktute chu hma la turin a fuih a. Dilna thehluh kawng a hriatchian duh leh harsatna neite chu kaihruai a, theihtawp a pui zel turin a chah bawk.

He hunah hian Planning & Program Implementation Department-a Secretary Lalmalsawma Pachuau chuan Bana Kaih Scheme portal-a dilna lut Batch hmasa ber chu Nodal Officer-ten an thlitfim hnuah November ni 21-ah Apex Body-in endik leh hman tur a ruahman a nih thu a sawi a. Kumin November thla chhung vek hian Progress Partner tura thlanchhahte chu tihfel hman tura ruahman niin Training-te pek an ni anga. December thla chhungin a viltu Department ten Progress partner-te Loan dilna tur an buaipui sak anga, nakum January thla chhung hian Progress partner-te hian hma la tan thei tawh tur a beisei a nih thu a tarlang a. Progress Partner thlanchhuahna hi thla tin neih chhunzawm tawh tur a ruahman a nih thu a sawi bawk

He thutkhawm ah hian Bana Kaih Scheme portal kaltlangin dilna 1314 lut a awm tawh thu tarlan a ni a. Commerce & Industries Department hnuaiah dilna lut tam berin, 540-a lut tawh a, Animal Husbandry & Veterinary Department hnuaiah 409-a lut tawh bawk a ni. Dilna lut zinga 1292 chu mimal anga dilna a ni a, a dang 22-te chu pawl anga dilna a ni. Nimin thleng a Nodal Department-te hmalakna sawiho a nih bakah dilna thehluhna dik lo leh Trade siam rem ngaite sawiho a ni a, dilna thehluttute tan a awlsam zawk nan Bana Kaih Scheme portal siamthat ngaite sawi a ni bawk..